Дзюдоҕа 21 саастаах спортсменнар икки ардыларыгар Россияҕа бастыыр иһин күрэхтэһиигэ Саха сирин спортсменнара Аина Моисеева уонна Сайыына Петрова кыһыл уонна үрүҥ көмүс наҕараадалары ыллылар. Бу туһунан «Спорт Якутии» иһитиннэрэр.
Ол курдук, тренер Дамдиндорж Гомбодорж иитиллээччитэ Аина Моисеева 48 киилэҕэ диэри ыйааһыҥҥа чемпион үрдүк аатын ылла. Саха спортсменката биэс хапсыһыыны кыайан дойдуга бастыыр иһин күрэхтэһиигэ икки төгүллээх кыһыл көмүс мэтээл хаһаайына буолла.
Саха сирин сүүмэрдэммит хамаандатыгар үрүҥ көмүс мэтээли Р.М. Дмитриев аатынан Олимпийскай резервэ училищетын устудьуона Сайыына Петрова аҕалла. Кини 44 киилэҕэ диэри ыйааһыҥҥа кииристэ, манна мэтээл иһин 25 кыттааччы охсуста.
Биэс хапсыһыыттан түөрдүгэр кыайан, үрүҥ көмүс мэтээли ылла, Россия спордун маастарын нуорматын толордо уонна 2022 сылга дойду сүүмэрдэммит хамаандатын састаабыгар киирдэ.
Сэтинньи 21-27 күннэригэр буола турар күрэхтэһиигэ 600-тэн тахса спортсмен кыттар — 374 уол уонна 253 кыыс.
