Эдьигээн сэлиэнньэтигэр «Кыайыы 65 сыла» хочуолунайга биэс хочуолун өрөмүөннээтилэр. Ол курдук, билиҥҥи кэмҥэ 7 хочуол үлэлиир. Хочуолунай штатнай эрэһииминэн хааччаҕа суох үлэлиир. Бу туһунан СӨ ОДьКХ уонна энергетикатын миниистирэ Вячеслав Емельянов иһитиннэрдэ.
Кини бэлиэтииринэн, биэрэр итиитин температурата 76 кыраадыска тэҥнэһэр, нөҥүө өттүгэр – 53 кыраадыс.
«СӨ ОДьКХ» ГУП Эдьигээннээҕи салаатын өрөмүөнүн бырагырааматынан, 2025 сылга хочуолунайга 3,5 МВт күүстээх 3 хочуолу уларытар былааннанар, ону тэҥэ баар хочуоллар туруктарын сыаналыырга анаан ититэр энергоустановкалары техническэй өттүттэн көрөр үлэлэр ыытыллыахтаахтар. Бу бэрэбиэркэ түмүгүнэн Эдьигээн салаатын өрөмүөнүн бырагырааматыгар көннөрүүлэри киллэриэхтэрэ.
Билиҥҥи кэмҥэ салааҕа силиэстийэлиир хамыыһыйа үлэтин саҕалаата. Хамыыһыйа састаабыгар Эдьигээн улууһун, Ростехнадзор Ленскэйдээҕи управлениетын, СӨ ОДьКХ уонна энергетикатын министиэристибэтин, «СӨ ОДьКХ» ГУП бэрэстэбиитэллэрэ киирдилэр.
Санатарбыт курдук, тохсунньу 4 күнүгэр Эдьигээн сэлиэнньэтин «Кыайыы 65 сыла» хочуолунайыгар хочуоллар үлэлэрэ тохтуу сылдьыбыттара бэлиэтэммитэ.
