Саха Өрөспүүбүлүкэтин тыатын хаһаайыстыбатын туйгуна, «Барча» КФХ салайааччыта, «Эрэл» СХПК бэрэссэдээтэлэ Семен Барчахов сырдык кэриэһигэр Тамалакаан нэһилиэгэр сааскы ат күрэҕэ тэрилиннэ.
Ат сүүрдүүтэ 800, 1200 уонна 1600 миэтэрэлээх дистанцияларга буолла. Ол кэнниттэн айаас соноҕоһу айааһыыр күрэх ыытылынна. Манна үстүү киһилээх сэттэ хамаанда кииристэ. Сорох сылгы налыччы, бэринимтиэ, онтон биирдиилээн кыыл сылгылар өчөһөн туран миинньибит киһилэрин туора маара быраҕаталаан кытаанах майгыларын көрдөрдүлэр.
Үтүө суобастаахтык үлэлээбит, тыа хаһаайыстыбатыгар сүдү кылаатын киллэрбит эдэр үлэһит Семен Барчахов аатын үйэтитэргэ маннык тэрээһиннэр инникитин даҕаны ыытыллыахтара.
