Үөһээ Бүлүүгэ анал байыаннай дьайыы байыастарыгар, Ийэ дойдуну көмүскээччилэргэ анаан оҥоһуллар Мемориальнай болуоссат экспозициятыгар байыаннай тиэхиньикэ кэллэ.
СВО-ҕа Ийэ дойдуну көмүскүү сылдьан олохторун толук уурбут буойун уолаттар Албан ааттарын үйэтитэргэ, дойду харысхалыгар турбут саллааттары чиэстииргэ, ону тэҥэ үүнэр көлүөнэни военно-патриотическай иитиигэ анаммыт Мемориальнай болуоссаты тутарга билигин бырайыактааһын үлэтэ бара турар.
Үөһээ Бүлүү улууһун дьаһалтата РФ Оборона Министиэристибэтин кытта ыкса үлэлэһэн муниципальнай бас билиигэ босхо байыаннай тиэхиньикэлэр бэриллибиттэрэ:
– «БРМ-1» бойобуой разведка массыыната (Комсомольск-на-Амуре сэрии чааһын сириттэн кэллэ);
– «Т-55А» танк (Комсомольск-на-Амуре куораттааҕы сэрии чааһын сириттэн кэллэ);
– 122-мм «Д-30» гаубица (Забайкальскай кыраай Лесной Городок бөһүөлэгэр баар сэрии чааһыттан кэллэ).
Бу туһунан улуус дьаһалтатын пресс-сулууспата иһитиннэрэр.
