«Ростелеком» Үөһээ Бүлүү аҕыс сэлиэнньэтин олохтоохторугар дьиэ интернетин хааччаҕа суох тарыыбын холбоото. Бу туһунан хампаанньа пресс-сулууспата иһитиннэрэр.
«Тарыыпка сөкүүндэҕэ биэс мегабитка тиийэ түргэннээх хааччаҕа суох кээмэйдээх трафиктаах. Бу иннинэ олохтоохтор спутник ханаалын сибээһин өҥөтүнэн туһанан олорбуттара», — диэн иһитиннэриигэ этиллэр.
«Ростелеком» Хоро, Липпэ Атах, Сайылык, Далыр, Харбала, Боотулу, Баҕадьа уонна Дүллүкү сэлиэнньэлэригэр тиийэ магистральнай волоконнай ситими оҥордо. Сөкүүндэҕэ уон гигабайка тиийэр кыахтаах магистраль уһуна 185 килэмиэтиргэ тэҥнэстэ.
Тутуу 2019 сылтан 2020 сылга диэри Үөһээ Бүлүү дьаһалтатын кытта бииргэ үлэлэһии чэрчитинэн ыытылынна.
««Ростелеком» инфраструктура бырайыактарын олоххо киллэрэр улахан уопуттаах. Кэлэр сылга Үөһээ Бүлүү дьаһалтатын кытта үлэбитин салҕыахпыт уонна Куду, Быракаан, Кырыкый уонна Өргүөт сэлиэнньэлэригэр диэри оптическай сибээс линиятын тардыахпаыт», — диэтэ «Ростелеком» хампаанньа Саха сиринээҕи корпоративнай уонна судаарыстыбаннай салаатын филиалын дириэктэрэ Прокопий Неустроев.
