Үөһээ Бүлүү улууһун иистэнньэҥнэрэ чуолаан «Дойдум тыына» түмсүү күннэтэ түбүгүрэн алгыстаах мөһөөччүктэрин тигэллэр. Хомуур иһигэр киирэр сахалыы харысхаллаах хаппар, сылаас сэлиэччик, тактическай ырбаахы, ыстаан, футболка, маскировачнай панама, автомат оптическай бырыссыалын уонна уоһун харыстыыр чехоллар. Халлаан тымныйбытынан сибээстээн эбии куллуку уонна кээнчэ тигэн саҕалаатылар.
Маны тэҥэ оскуолалар уонна оҕо уһуйааннара, биирдиилээн тэрилтэлэр уонна улуус олохтоохторо буолан Саха сирин үрдүнэн ыытылла турар акцияҕа кыттыһан окопаҕа туттулар чүмэчилэргэ анаан кылгас бириэмэ иһигэр тимир банкалары хомуйдулар.
Тутар уонна мунньан ыытар киин буолла оҕо технопарката. Оскуола үөрэнээччилэрэ хастыы да дьааһыгынан аҕалан туттараллар.
Барыта холбоон 21 тэрилтэ уонна биирдиилээн дьиэ кэргэн 1702 чүмэчи банкатын хомуйдулар. Саамай элбэҕи 4 нүөмэрдээх оскуола – 361 туттарбыт. Маны Дьокуускай куоракка Нам нэһилиэгин оскуолатын автобуһунан ыыттылар.
