Үөһээ Бүлүү олохтооҕун доруобуйатыгар ыар эчэйиини оҥорбуттарын иһин, полиция үлэһиттэрэ икки уорбаланааччы киһини туттулар. Бу туһунан Арассыыйа ИДьМ пресс-сулууспата иһитиннэрэр.
Улуус полициятын салаатын дьуһуурунай чааһыгар төбөтүгэр бааһырыылаах, дьукку барыылаах, көҕөрүүлээх киһи балыыһаҕа киирдэ диэн биллэрбиттэр.
Холуобунай ирдэбил үлэһиттэрэ ыар эчэйиигэ уорбалаан, урут сууттана сылдьыбыт, үлэтэ суох, олохтоох икки киһини туттулар.
«Быһылаан буолар күнүгэр 35 саастаах уорбаланааччы атастарын кытта арыгылаабыта биллибит. Аһыы олорон бу билсэр дьонун кытта иирсэн турбут. Иирсээн охсуһууга кубулуйбут. Хара санаалаах кинилэргэ кыыһыран баран барбыт, ол эрээри ситиһэргэ санаммыт», — диэн иһитиннэриигэ этиллэр.
Кэлин бу туһунан 36 саастаах доҕоругар кэпсээбит уонна киниэхэ көмө буоларыгар сөбүлэҥин ылбыт. Эбии итирдэр утаҕы иһэн баран, уорбаланааччы түүн доҕорун кытта, хас да чаас анаараа өттүгэр билсэр дьонунаан арыгылаабыт дьиэтигэр, төннөн кэлбит.
Эр дьон ааны алдьатан киирэн, утуйа сытар дьону уһугуннарбыттар уонна кыыһыран буруйдуу сатаабыттар, диэн иһитиннэрэллэр.
«Охсуһуу кэмигэр уорбаланааччылар эмсэҕэлээччини охсуолаабыттар, эр дьонтон биирдэстэрэ төбөҕө маһынан биэрбит», — диэн пресс-сулууспа үлэһиттэрэ быһаараллар.
Уорбаланааччыларга «Олорор дьиэ тыытыллыа суохтааҕа кэһиллибитин» уонна «Соруйан билэ-билэ доруобуйаҕа эчэтиини оҥоруу» диэн РФ ХК ыстатыйаларынан холуобунай дьыала тэриллибит.
