Үөһээ Бүлүүгэ, алтынньы 29 күнүгэр, түүн элбэх кыбартыыралаах дьиэҕэ баһаар түмүгэр эр киһи уонна дьахтар уокка былдьаннылар. Бу туһунан регионнааҕы ЫБММ пресс-сулууспата иһитиннэрэр.
Олохтоох бириэмэнэн түүн 03.25 чааска баһаары утары сулууспаҕа Ленин уулуссатыгар икки этээстээх дьиэ умайан эрэрин туһунан иһитиннэрии киирбитэ. Үс мүнүүтэнэн баһаарынайдар тиийиилэригэр дьиэ хойуу буруоран туолбут, аҕаһас уот умайа турбут.
«Гаастан, буруоттан харыстыыр сулууспа биир киһи өлүгүн уонна түөрт эмсэҕэлээбит киһини булбут, ол иһигэр 2017, 2016 уонна 2012 сыллаах төрүөх үс оҕо баар», – диэн иһитиннэриигэ этиллэр.
Баһаар түмүгэр 1999 сыллаах төрүөх эр киһи өлбүт, 1990 сыллаах төрүөх дьахтар өйүгэр кэлбэккэ өлбүт, үс оҕо билигин балыыһаҕа сытар. Баһаартан 17 квадратнай миэтэрэ иэннээх кыбартыыра эмсэҕэлээбит.
Баһаар миэстэтигэр билигин Россия ЫБММ үлэһиттэрэ үлэлииллэр. Баһаар биричиинэтэ, буруйдаах уонна хоромньу быһаарыллар. Уоту умуруорууга 15 киһи уонна үс тиэхиньикэ үлэлээтэ.
Саха сирин Ил Дархана Айсен Николаев сорудаҕынан өрөспүүбүлүкэ премьерэ Андрей Тарасенко, СӨ доруобуйа харыстабылын миниистирин эбээһинэһин толорооччу Лена Афанасьева, биэс быраас Үөһээ Бүлүүгэ көттүлэр.
