Бүгүн саҥа филиал үлэтин туһунан киин уонна улуус салайааччылара, СӨ ыччат дьыалатын уонна социальнай коммуникацияларга министиэристибэтин эппиэтинэстээҕэ көрсүһүүгэ дьүүллэстилэр. Көрсүһүү түмүгүнэн биэдэмэстибэлэр икки ардыларынааҕы сөбүлэҥҥэ илии баттанна.
Ил Дархан Айсен Николаев сорудаҕар идэтийбит психологтар байыастары, демобилизацияламмыттары уонна кинилэр дьиэ кэргэттэрин кытта үлэ ыытыллара наадалааҕа бэлиэтэнэр. Бу туһунан бүгүн Дьокуускайдааҕы өрөспүүбүлүкэтээҕи психологическай киин дириэктэрэ Владимир Скрябин иһитиннэрдэ.
Ону таһынан кииҥҥэ психологическай көмөҕө наадыйар дьон тиийиэхтэрин, көрдөрүөхтэрин сөп. Киин дьон-сэргэ психологическай доруобуйатын кытаатыннарарга, чөлүгэр түһэрэргэ аналлаах үлэни ыытар.
Ону кытта психолог улуустарга тахсан көрөр госпитальнай үлэ, бөлөҕүнэн уонна хас биирдии киһини туспа көрөр хайысхалаах терапия, СВО-ҕа сырдык тыыннара быстыбыт байыастар дьиэ кэргэттэригэр көмө туһунан сырдатта. Ыам ыйга түөрт тыһыынча саҥа уонна иккистээн көрүү, 4,6 тыһ индивидуальнай уонна бөлөҕүнэн ыытыллар психологическай үлэ оҥоһулунна.
Дьокуускайга бу нүөмэринэн суруттарыахха сөп, эбэтэр филиал нүөмэрдэрин ыйыталаһыахха сөп: 31-91-09.
Өйөбүл төлөпүөнэ: 8-800-100-35-50 эбэтэр 122, ол кэннэ 6 уонна 2 баттыыгыт. Психологтар учуокка туруорбаттар — ыарыһах буолбакка эрэ клиент быһыытынан көрөллөр.
Бу үлэ Ил Дархан Айсен Николаев сорудаҕынан, СӨ Бырабыыталыстыбатын бэрэссэдээтэлин солбуйааччы Ольга Балабкина салалтатынан ыытыллар.
