Кулун тутар 11-12 күннэригэр Үөһээ Дьааҥы куоратыгар Дьокуускай, Мэҥэ Хаҥалас, Чурапчы, Эдьигээн, Усуйаана уонна Эбээн Бытантай улуустарыттан делегациялар кыттыылаах Арктикатааҕы үөрэх сайдыытыгар II өрөспүүбүлүкэтээҕи форум ыытылынна.
«Пленарнай мунньахха Арктика үөрэҕин сайыннарар сүрүн миэханизмнар, педагогическай түмсүү Арктикаҕа уопсастыбаннай-бэлитиическэй процесстары сайыннарыыга оруола, орто-профессиональнай үөрэхтээһин уонна профессиональнай үөрэхтээһин үөрэх бырагыраамаларын Арктика зонатыгар ситим быһыытынан олоххо киллэрии, төрүт тыллары үөрэтии боппуруостара көрүлүннүлэр. Өрөспүүбүлүкэ Арктикатын оройуоннарыгар үөрэхтээһин тиһигин үлэтин уопута көрдөрүлүннэ», – диэн организатордар эттилэр.
Сиэксийэлэр мунньахтарыгар үөрэх управлениетын салайааччылара, оскуола дириэктэрдэрэ уонна педагогтар Арктика усулуобуйатыгар үөрэх хаачыстыбатын үрдэтии, каадырдары сайыннарыы, тыл уонна култуура араас өрүттэрин харыстааһын уонна сайыннарыы, көс уонна агроүөрэхтээһин, профессиональнай үөрэхтээһин уонна профориентация моделларын боппуруостарын ырыттылар.
Ону таһынан, форум бырагырааматыгар – салайааччыларга анаммыт «Арктическое образовательное пространство : территория стабильности и роста» стратегическай сиэссийэ, квалификацияны үрдэтэр куурустар, билим-мэтэдиичэскэй сэминээрдэр, иитээччилэр, учууталлар уонна педагогтар маастар-кылаастара, «Жизнь в Арктике: партнерство во благо будущего» диэн дискуссионнай былаһаакка бааллар.
Форум спортивнай бырагырааматыгар «Спортивная Арктика: Игры народов Севера» кыттыылаахтара хотугу норуоттар спордун көрүҥнэригэр кытыннылар.
Бүгүн форум түмүктэри таһаарыынан уонна резолюцияны ылыныынан түмүктэниэҕэ.
Бастакы форум 2024 сылга ыытыллыбыта. Тэрээһин көҕүлээччитэ – өрөспүүбүлүкэ билимин академиятын Төрүт тыллары үөрэтии, харыстааһын уонна сайыннарыы киинин салайааччыта, педагогика билимин доктора, профессор Феодосия Габышева.
Хаартыска: sakha.gov.ru
