Саха сиригэр уон бэһис IT-киин Үөһээ Дьааҥы Баатаҕайыгар арылынна. Бу туһунан сибээс уонна инновация министиэристибэтэ иһитиннэрэр. Тэрээһиҥҥэ оройуон баһылыгын бастакы солбуйааччы Гаврил Ефимов уонна IT-паарка үлэһитэ Кирилл Карпушкин кытыннылар.
«Оройуон информационнай сайдыытыгар төһүү күүс буолар киин арылынна. Биһиэхэ оптоволокно ситимэ кэлиитин түргэтэтиэ диэн эрэнэбит», — диэбит Гаврил Ефимов. Оройуон уонна «Якутия» технопаарка тэҥҥэ үлэлэһии туһунан сөбүлэһии түһэристилэр. Баатаҕай киинин сүрүн хайысхалара — моделирование, дизайн, сыһыарыылары уонна бырагыраамалары оҥоруу, үөрэх куурустарын тэрийии, нэһилиэнньэ интернет технологияларын билэригэр үлэлэһии.
Оройуоннарга маннык IT-кииннэр Ил Дархан Айсен Николаев дьаһалынан арыллаллар. «Якутия» технопаарка тиэхиньикэнэн уонна методическай өйөбүлүнэн көмөлөһөр.
