Ардах халааныттан эмсэҕэлэбит Үөһээ Дьааҥы улууһугар оттук сезонугар наадалаах таһаҕаһы тиэрдиигэ ЫБММ көмөлөһүөҕэ. Бу туһунан Уһук Илиҥҥэ РФ президенин боломуочуйалаах бэрэстэбиитэлэ Юрий Трутнев Telegram-ханаала иһитиннэрэр.
«Ардах халаанын содулун туоратыыга аналлаах мунньах түмүгүнэн Юрий Трутнев Үөһээ Дьааҥы улууһугар оттук сезонугар таһаҕаһы тиэрдиигэ ЫБММ Ми-26 бөртөлүөтүнэн көмө оҥорорго соруйда», — диэн иһитиннэриигэ этиллэр.
Ону таһынан, Үөһээ Дьааҥыга халаантан көмүскүүр даамбаны тутуу боппуруоһун ырыттылар. Туһааннаах докумуоннары 2021 сыл атырдьах ыйыгар Росводресурска ыыппыттар, күн бүгүҥҥэ диэри сайаапканы көрө иликтэр.
Быйыл сайын ардах халааныттан Үөһээ Дьааҥыга уонна Кэбээйигэ 11 нэһилиэнньэлээх пуун эмсэҕэлээтэ. Дьааҥы өрүскэ уу таһыма үрдээбитинэн 210 тиэргэн уонна 60 элбэх кыбартыыралаах дьиэлэр (бу дьиэлэргэ 514 киһи олорор, ол иһигэр 132 оҕо) ууга былдьаммыттара.
