Саха сирин толорор былаас уорганнарын Үөһээ Халыма улууһугар ыытыллар отчуоттарыгар олохтоохтор олох-дьаһах хомунаалынай хаһаайыстыбатын үлэтин хайҕыыллар. «Саха сирин ОДьКХ» СУТ ааспыт сылга икки хочуолунайга саҥа тэриллэри туруорбут, инженернэй ситимнэргэ өрөмүөн үлэлэрин ыыппыт. 2026 сылга Зырянка бөһүөлэгэр уонна Уһун Күөл сэлиэнньэтигэр саҥа хочуолунайдары тутар былааннанар.
Зырянкаҕа дойду бэрэсидьиэнэ Владимир Путин көҕүлээбит «Көдьүүстээх тырааныспар ситимэ» национальнай бырайыак чэрчитинэн, 2030 сыл бүтүөр диэри ууга баарбат саҥа аэропорт тутуллуоҕа диэн бэлиэтэннэ. Быйыл проектнай-сметнай докумуоннары оҥоруу көрүллүбүт. Тутуу үлэтэ 2027 сылга саҕаланыаҕа.
Бырабыыталыстыба отчуотун бастакы күнүгэр үлэлиир бөлөх Нелемнэйгэ, Угольнайга уонна Үөһээ Халымаҕа олохтоохтору кытта көрсүстэ. Оттон олунньу 4 күнүгэр Уһун Күөл уонна Утайа сэлиэнньэлэригэр отчуоттар ыытылыннылар. Түмүктүүр көрсүһүү Зырянка бөһүөлэгэр буолуоҕа.
Олохтоохтор улуус иһинээҕи, оройуоннар икки ардыларынааҕы дьону таһыыга чэпчэтиилээх авиабилиэттэри, эргиэн-логистика киинигэр социальнай суолталаах бородуукталарынан хааччыйыы туһунан ыйытыылары көтөҕөллөр. Саха сирин Сыана бэлиитикэтигэр судаарыстыбаннай кэмитиэтин бэрэссэдээтэлэ, оройуон куратора Николай Бочков быһаарбытынан, быйыл федеральнай бүддьүөттэн хотугу таһаҕаһы таһыыны, ол иһигэр социальнай суолталаах бородуукталары таһыыны оҥорорго үп кирэдьиитэ бэриллибит.
Ону таһынан, нэһилиэнньэни эминэн хааччыйыы, доруобуйа харыстабылын үбүлээһин, тыа хаһаайыстыбатын боломуочуйалара уонна да атын боппуруостар интэриэһиргэтэллэр.
Бырабыыталыстыба үлэлиир бөлөхтөрүн отчуоттара өрөспүүбүлүкэ бары муниципальнай тэриллиилэригэр кулун тутар саҕаланыытыгар Дьокуускайга түмүктэниэхтэрэ. Отчуот түмүктэрэ «Саха» НКИХ араадьыйатыгар, тэлэбиидэнньэтигэр тахсыахтара.
Ил Дархан Айсен Николаев бу иннинэ бэлиэтээбитинэн, былаас уонна олохтоохтор маннык сирэй алтыһыылара чугас ситими олохтуурга, чуолаан ыраах сытар, тиийэргэ уустук нэһилиэнньэлээх пууннарга наадалаах уонна туһалаах. Кини этэринэн, үгүс киһи былаас бэрэстэбиитэллэрин кытта тыыннаах кэпсэтиини ордороллор, ол кинилэр нэһилиэнньэлээх пууннарын сайдыытын анал боппуруостарын ырытарга кыах биэрэр.
Отчуот кэмигэр өрөспүүбүлүкэ бырабыыталыстыбатын бэрэстэбиитэллэрэ нэһилиэнньэни кытта көрсүһүүлэргэ сыл устата оҥорбут үлэлэрин туһунан иһитиннэрэллэр, сэлиэнньэлэр уонна нэһилиэктэр сайдыыларын туһунан ыйытыыларга толору хоруйдары биэрэллэр, социальнай эйгэ эбийиэктэрин кэрийэллэр, дьону-сэргэни кытта тус боппуруостарынан көрсөллөр.
Интернет ситимҥэ https://otchet2025.sakha.gov.ru диэн аадырыска СӨ Бырабыыталыстыбата 2025 сыллааҕы отчуотун официальнай саайта үлэлиир.
РФ бэрэсидьиэнэ Владимир Путин эрдэ бэлиэтээбитинэн, судаарыстыбаннай былаас уорганнара аһаҕас буолуулара, олохтоохтору кытта хардары ситими олохтууллара судаарыстыба үлэтин көдьүүһүн улаханнык үрдэтэр.
Хаартыска: «Колымские новости» хаһыаттан
