Axios диэн Америка сонуннардаах сайта бэрэсидьиэн Дональд Трамп эйэ былаанын сиһилии чуолкайдаан суруйда.
Сүрүнэ:
— Биир сирэйдээх Трамп докумуона «түмүктүүр этии» диэн ааттанар. Өскөтүн чугастааҕы кэмҥэ ким эмит эйэ былаанын тутуспат буоллаҕына Үрүҥ дьиэ кэпсэтииттэн тахсарын биллэрдэ;
— Трамп этиитэ олоххо киирэрин туһугар Зеленскэй элбэх боппуруостарга туран биэрэрэ ирдэниллэр
— Эйэ былаана Россияҕа ордук табыгастаах диэн ыйыллар.
Россия:
— Америка Крымы Россия территориятынан билиниэҕэ;
— Луганскай уонна Донецкай Норуодунай Өрөспүүбүлүкэлэри, Херсонскай уонна Запорожскай уобаластары эмиэ Россия территорияларынан ааҕыаҕа
— Украина НАТО чилиэнэ буолбат, ол эрээри Евросойууска киириэн сөп;
— 2014 сылтан Россияҕа киллэрбит санкциялары тохтотуохтара;
— Россия уонна Америка экономикаҕа бииргэ үлэлэһиилэрин кэҥэтиэхтэрэ, чуолаан энергетикэҕэ уонна бырамыысыланнаска.
Украина:
— Америка кыттыыта суох куттал суох буолуутун хааччыйарга кэккэ гарантиялары ылыаҕа;
— Харьковскай уобалас сорҕотун төнүннэриэхтэрэ;
— Днепр өрүскэ диэри мэһэйэ суох сырыы;
— Куораттары, нэһилиэнньэлээх пууннары чөлүгэр түһэриигэ көмө, үп-харчы. Ол эрээри харчы хантан кэлэрин ыйбатахтар.
Санатар буоллахха, эрдэ The Telegraph былаан сэттэ пуунтан турарын иһитиннэрбитэ. Манна Крым Россия территорията буоларын билинии уонна Россия утары санкциялары тохтотуу баара биллибитэ.
