2042 сылга диэри дойду электроэнергетикатын эбийиэктэрин олохтооһун генеральнай схематын РФ Бырабыыталыстыбатыгар бигэргэттилэр. Докумуоҥҥа сүрүннээн РФ Судаарыстыбаннай Сэбиэтин «Энергетика» хайысхатыгар хамыыһыйатын мунньаҕар оҥоһуллубут быһаарыылар киирдилэр.
«Бу улахан суолталаах докумуон Россия экономикатын электро-эниэргийэнэн быстала суох хааччыйыы сүрүн күүстэрин уонна эбийиэктэрин быһаарар», – диэн бэлиэтээн эттэ РФ Судаарыстыбаннай Сэбиэтин «Энергетика» хайысхатыгар хамыыһыйатын бэрэссэдээтэлэ Айсен Николаев.
Генсхемаҕа киирбит быһаарыыларга Сибиир уонна Уһук Илин регионнарын уотунан хааччыйыы боппуруостара эмиэ киирэллэр. Холобур, Саха сиригэр аччыгый кыамталаах атомнай ыстаансыйаны, Новоленскайдааҕы ТЭС, ону тэҥэ Нерюнгритааҕы ГРЭС-кэ эбии икки энерго-блогу тутуу. Ону тэҥэ Дьокуускайга ГРЭС-2 иккис уочаратын, онтон Чульман бөһүөлэгэр «Южно-Якутскай» ТЭС-и үлэҕэ киллэрии былааннанар.
Эбэн эттэххэ, докумуоҥҥа 2035 сыл кэннэ Тимптон өрүскэ 1 ГВт кыамталаах Канкуннааҕы ГЭС-и тутуу уонна эбийиэктэр кыамталарын тиэрдэр уот ситимнэрин тардыы туһунан суруллар.
Генсхема сүрүн соруга – оҥорон таһаарар кыамта уонна уот ситимин хаһаайыстыбатын табыгастаах структуратын тэрийэн, бигэ туруктаах уонна таһаарыылаах үлэлээх уотунан хааччыллыыны ситиһии. Бу докумуон уотунан хааччыллыы дефицитэ тахсыбатыгар уонна энергетикэ систиэмэтин үлэтигэр эрэллээх буолуу миэрэлэрин олохтооһуҥҥа туһуланар.
Ону тэҥэ схема уоту оҥорон таһаарыы уонна туттуу туругун тэҥнээн биэрэр подстанциялар, уот ситимин сүрүн хайысхаларын быһаарар.
Генсхема РФ 2050 сылга диэри Энергетическэй стратегиятын, дойду социальнай-экономическай сайдыытын билгэлээһини уонна билигин баар электроэнергетика эбийиэктэрин туругун учуоттаан оҥоһулунна.
Санатар буоллахха, Айсен Николаев ааспыт сыл от ыйыгар РФ Судаарыстыбаннай Сэбиэтин «Энергетика» хайысхатыгар хамыыһыйатын бэрэссэдээтэлинэн бэрэсидьиэн Владимир Путин ыйааҕынан анаммыта.
Күн бүгүн РФ Судаарыстыбаннай Сэбиэтин «Энергетика» хайысхатын хамыыһыйата 136 чилиэннээх. Манна РФ 64 субъегыттан бэрэстэбиитэллэр бааллар, ол иһигэр 17 регион салайааччыта. Ааспыт сылга хамыыһыйа 11 мунньаҕы ыыппытыттан 6-тын Айсен Николаев тэрийэн ыыппыта.
Хаартыска: Семен Аммосов / НВК «Саха»
