«Эльгауголь» хампаанньа бэрэстэбиитэллэрэ Нерюнгри оройуонун интэрнээт-оскуолатыгар 1 мөлүйүөн солкуобай суумалаах сертификаты туттарда. Бу туһунан Нерюнгри оройуонун дьаһалтатын пресс-сулууспата иһитиннэрэр.
Бу үп уолаттарга уонна кыргыттарга технология уруогун оборудованиетын ылыыга ыытыллыаҕа.
«»Эльгауголь» хампаанньа уонна кини салалтата Нерюнгри оройуонугар үлэлиир социальнай тэрилтэлэри өйөөһүҥҥэ уонна аһымал көмөнү оҥорууга улахан болҕомтону уурар. Хампаанньа оҥорор өйөбүлүн иһин истиҥник махтанабын», — диэн оройуон баһылыга Виктор Станиловскай эттэ.
Хампаанььа Саха сирин уонна Амурскай уобалас 430 олохтооҕор улахан аһымал акцияны оҥорбута бэлиэтэнэр.
Ол курдук, Чульман бөһүөлэгин кырдьаҕастар олорор дьиэлэригэр таҥаһынан уонна ирдэнэр оборудованиенан, «Тускул» кииҥҥэ медицинскэй оборудованиенан, тиэхиньикэнэн уонна оонньуурдарынан, өрөспүүбүлүкэтээҕи интэрнээт-дьиэҕэ бытовой тиэхиньикэнэн, оонньуурдарынан уонна «Соболь» массыына ыларга сертификатынан көмөлөспүт. «Вектор» кииҥҥэ оонньуурдары уонна тиэхиниьикэни, «АРКТИКА» интэрнээт-оскуолаҕа көмпүүтэрдэри уонна ноутбуктары бэлэхтээбит.
