Учууталга сүгүрүйүү
Үтүө дьон суола үйэлэргэ сүппэт,
Улахан учуутал — умнуллууну билбэт
Сунтаар улууһун Элгээйи бөһүөлэгин историятыгар киирэр, хаһан да умнуллубат биир кэрэ бэлиэ күн буолан ааста.
РСФСР уонна Саха АССР үтүөлээх учуутала, Саха АССР норуотун үөрэҕириитин туйгуна, учууталлар учууталлара, «Гражданскай килбиэн» бэлиэ хаһаайына, Сунтаар улууһун, Элгээйи нэһилиэгин бочуоттаах олохтооҕо, тойуксут, оһуохайдьыт, норуот ырыаһыта Егор Михайлович Николаев 100 сыллаах үбүлүөйүнэн, П. Х. Староватов аатынан Элгээйи орто оскуолатыгар баар учуутал тулаһатыгар өйдөбүнньүк бүүс турда, «Оһуор» култуура дьиэтигэр «Холо суох уолчаан» автобиографическай дьүһүйүү-испэктээк ыраахтан-чугастан кэлбит дьон кутун тутта, сүрэҕин долгутта.
Ол курдук, Егор Михайлович 3 кылааһы бүтэрэр сылыгар ийэтэ ыалдьан, 6 оҕотун хаалларан, орто дойду олоҕуттан барбыта, оскуолатын бүтэрэн, Күүкэй күөлүн туораары муустаах ууга түспүтэ. Олох улахан охсуутугар түбэһэн, хайдах курдук үтүө дьоннор көмөлөрүнэн, олоххо тардыһыы күүһүнэн маннык курдук улахан ситиһиигэ тиийиэххэ сөбүн илэ харахтарынан көрөн сөҕөн-махтайан, испэктээк саҕаланыаҕыттан бүтүөр диэри «харах уулаах көрдүбүт» диэн ыалдьыттар, нэһилиэк олохтоохторо санааларын сүрэхтэнии кэнниттэн тэриллибит сандалы тула үллэһиннилэр.
«Тыыннаахтар эрэ өйдүүр, үйэтитэр буоллахтарына, история чөлүнэн хаалар, ытык дьон үйэлэргэ ахтыллар дьылҕаланар. Чахчы даҕаны, Егор Михайлович албаннаах аартыктаах, баай ис хоһоонноох олоҕо толору сырдатылынна», – диэн саха тылын, литературатын учуутала Людмила Павлова үөрүүтүн үллэстэр.
