Медик-волонтердар хамаандалара ZOOM платформаҕа өрөспүүбүлүкэ олохтоохторугар босхо онлайн-викторина ыталлар.
2019 сыллаахха Алена Кычкина, Евгений Амбросьев, Мария Анисимова уонна Анастасия Попова MediQuiz сайыннарар-үөрэтэр суолталаах оонньуу оҥорбуттара. Икки уонна онтон элбэх кыттааччылаах хамаандалар киинэ, музыка, оонньуу уо.д.а. тиэмэлэргэ боппуруостарга эппиэттииллэр.
Коронавирус саҕаланыан иннинэ оонньууну Дьокуускай уопсастыбаннай тырааныспардарыгар ыыталлар этэ. Хааччахтааһын саҕаламмытын кэннэ оонньууну тохтоппуттара уонна ыам ыйыттан ZOOM платформаҕа салҕаабыттара.
«Бастаан медицинэ тиэмэлэринэн оонньуу ыытар этибит, онтон атын тиэмэлэри эмиэ киллэрбиппит. Оонньуу саҕаланыан иннинэ уонна түһүмэхтэр икки ардыларыгар биһиги ыарыылартан сэрэтэр ньымалары кэпсиибит, видеороликтарбытын көрдөрөбүт. Онон кыттааччылар аралдьыйаллар уонна билии ылаллар. Холобур, сарсын, Хэллуиҥҥа уонна инсульту утары охсуһуу Аан дойдутааҕы күнүгэр аналлаах оонньуу буолуоҕа, онно биһиги инсульт ыарыы туһунан уонна бастакы көмөнү хайдах оҥоруохха сөбүн кэпсиэхпит», — диэн эпидемиология уонна гигиена уопсай бырааһа уонна «Медик-волонтердар» тэрилтэ өрөспүүбүлүкэтээҕи сүрүннээччитэ Алена Кычкина кэпсээтэ.
Оонньуу нэдиэлэҕэ иккитэ буолар, 2020 сыл ыам ыйыттан волонтердар 30-ча викторина ыыттылынна. Алена Кычкина бэлиэтииринэн, оонньуу Саха сиринэн эрэ хааччахтаммат, кэнники квизтарга Москва уонна Владивосток куорат олохтоохторо кытыннылар.
Бастыҥ хамаандалар туһалаах бириистэринэн наҕараадаланаллар: битэмииннээх утахтарынан, мүөтүнэн, диетическай хлебцыларынан.
Бырайыак быйыл, балаҕан ыйыгар, бэрэсэдьиэн гранын Пуондатын 3,5 мөлүйүөн солкуобай кээмэйдээх өйөбүлүн ылбыта. Квизтэри таһынан, онлайн көрүҥүнэн нэһилиэнньэни сырдатыы, медик-волонтердар оскуолалара уонна да атын босхо тэрээһиннэр киирэллэр.
«Бу күннэргэ волонтердар бастакы оскуолалара түмүктэннэ. Биир ый устата экспертэр, наука доктордара кэлэн лиэксийэ аахтылар. Иккис оскуола сэтинньи ыйга ыытыллыаҕа», — диэн быраас үллэһиннэ.
2021 сыл тохсунньу ыйыгар тэрийээччилэр эт-хаан үлэтин кэһиллиитин сэрэтэр тэрээһиннэри ыытары былаанныыллар. Сертификаттаах тренердэр коронавирустан үтүөрбүт дьоҥҥо дьарыктары ыытыахтара.
Быйыл пуонда коронавируһу утары охсуһар кэмҥэ, коммерческайа суох социальнай тэрилтэлэри өйүүр сыаллаах анал конкурус ыыппыта. 900 хамаанда кыайыылаах таҕыста уонна уопсайа 2 миллиард солкуобай суумалаах бэрэсэдьиэн граннарын ыллылар.
2020 сылга өйөбүлү уопсайа 5 319 коммерческайа суох тэрилтэ бырайыага ылла, уопсай суумата 10,7 миллиард солкуобайга тэҥнэстэ.
