Дьокуускай куорат баһылыга Евгений Григорьев 19 №-дээх оскуола иһигэр баар 689 №-дээх быыбардыыр учаастакка тиийэн куолаһын биэрдэ. Кини быыбар үс хонук устата ыытылларын табыгастааҕын бэлиэтээтэ.
«Күүппүт быыбардыыр күннэрбит турдулар. Быыбардыыр учаастактарга дьон-сэргэ бүгүн элбэх. Бу норуот дойдутун кэскилигэр интэриэстээҕин көрдөрөр. Онон хас биирдиигитин кэлэн куоластааҥ диэн ыҥырабын. Модун Россия күүстээх бэрэсидьиэннээх буолуохтаах диэн ытык иэспин толордум!», — диэтэ киин куорат мээрэ.
Санатарбыт курдук, дойду бэрэсидьиэнин быыбара үс хонук устата кулун тутар 15-17 күннэригэр буолуоҕа. Быыбардыыр учаастактар сарсыарда 8.00 чаастан киэһэ 20.00 чааска диэри үлэлииллэр.
