Швецияттан төрүттээх футболист, «Спартак» москватааҕы хамаандатын уонна Швеция сүүмэрдэммит хамаандатын саба түһээччитэ Джордан Ларссон саха уолугар Дима Березовскайга илии протеһа ыларыгар көмөлөһүөҕэ.
«Кыһалҕалаах дьоҥҥо көмөлөһүү — «Спартак» майгытыгар баар. Ол иһин Дьокуускайтан сылдьар Димаҕа көмөлөһүөхпүн баҕардым. Кини «Спартак — оҕолорго» пуонда көрүүтүгэр сылдьар, мин киниэхэ протез ыларыгар көмөлөһүөм. Дима, эйиэхэ доруобуйаны уонна эпэрээссийэн ситиһиилээхтик ааһарыгар баҕарабын. Стадиоҥҥа өссө кэлэргин күүтэбин. Бииргэ барытын кыайыахпыт», — диэтэ кини Димаҕа видео сибээс нөҥүө.
Пуонда иһитиннэрэринэн, ПР2-СТР тас энергия источниктаах протез сыаната 450 тыһыынча солкуобай.
Дима Березовскай 2013 сыллаахха Дьокуускайга, Каландаришвили уулуссатын былаһааккатын аттыгар тутуу барар турар сирин күрүөтүн таарыйан уокка оҕустарбыт. Силиэстийэ дааннайынан, эргэ мас дьиэни көтүрэллэригэр, боруобаттаах остуолба күрүөҕэ сууллубут, ол түмүгэр күрүө үрдүк күүрүүлээх уотунан охсубут. 2014 сыллаахха тоҕус саастаах уол илиитин ампутациялаабыттар.
