Үгүлээт нэһилиэгэр муус устар 19 күнүгэр урукку Сэбиэскэй кэм саҕана Улуу Ленин төрөөбүт күнүгэр ыытыллар коммунистическай субуотунньук буоларын ахтан-санаан туран, Өрөспүүбүлүкэҕэ Оҕо сыла биллэриллибитинэн уонна нэһилиэк 390 сылынан тэрилтэлэр үлэһиттэрин, оскуола оҕолорун түмэн тутуу маһын эрбэммит дэлээнэтигэр мутук ыраастааһыныгар уопсай субуотунньук ыытылынна. Уопсайа 60-тан тахса үлэһит кыттыбыт, ол иһигэр оҕолор тахсан үлэлээтилэр.
Нэһилиэк дьоно-сэргэтэ, оҕолор бары түмсэн үлэҕэ көхтөөхтүк кыттан 200-чэкэ бэрэбинэ мутугун барытын мунньан ыраастаан бүтэрдилэр. Субуотунньук кэмигэр Байрон Иванов буһарбыт минньигэс шашлыгын, дьаһалта, балыыһа, оскуола үлэһиттэрэ буһарбыт мииннэрин субуотунньукка кыттыбыт дьоммут тото-хана аһаатылар. Бу күн оҕолор сибиэһэй салгыҥҥа үлэлээн, ойуурга тахсан оонньоон абыраннылар, аҕам саастаах дьон урукку оҕо саас кэмин ахтан-санаан аастылар.
