РФ Федеральнай Мунньаҕын Судаарыстыбаннай Дууматын депутата, бүддьүөт уонна нолуоктар кэмитиэтин чилиэнэ Галина Данчикова Саха сирин бастакы бэрэсидьиэнин Михаил Николаев кэриэһигэр анаммыт форум дьоһун суолтатын бэлиэтээтэ.
Кини бэлиэтииринэн, кылгас кэм иһигэр форум бэйэтин регион сайдыытыгар тыҥааһыннаах боппуруостары ырытар, быраактыкаҕа туттуллар быһаарыылары киллэрэр, араас салаалартан эдэр исписэлиистэр мустар суолталаах былаһаакка быһыытынан көрдөрдө.
«Форум сүрүн сыаннаһа — көхтөөх уонна идэлэригэр бэлэмнээх саҥа көлүөнэ бэрэстэбиитэллэрин түмэр, кинилэр стратегическай соруктары ырытан эрэ буолбакка, регион сайдыытыгар дьиҥнээх быһаарыылары этэргэ, киллэрэргэ бэлэмнэр», — диэн депутат тоһоҕолоото.
Галина Данчикова форум тиэмэлэрэ сыллата бириэмэни кытта тэҥҥэ хардыылаан иһэллэрин бэлиэтээтэ. Бу сылга үлэ муниципалитеттар экономическай туруктарын хааччыйыыга туһуламмыт: нэһилиэктэр сайдыыларыгар үбүлээһини киллэрии, тыа хаһаайыстыбатын саҥардытыы уонна экономика хайысхатыгар үүнүүнү туризм хайдах тардарын тула кэпсэтии буолар.
«Маннык дьүүллэһиилэр былаас уорганнарын үлэтигэр, ол иһигэр бүддьүөт уонна нолуок бэлиитикэтин оҥорууга, көмө буолар этиилэри оҥорорго кыах биэрэллэр», — диэн кини эттэ.
Парламентарий ыччат көҕүлээһиннэрин судаарыстыбаннай таһымҥа өйөөһүн уонна кинилэри өрөспүүбүлүкэ тэрээһиннэрин систиэмэтигэр киллэрии Михаил Николаев саҕалаабыт үлэтин салҕааһын эрэ буолбакка, Саха сирин өйдөөх каадырабай кыаҕын үөскэтэрин тоһоҕолоото.
Санатарбыт курдук, Николаевскай форум үһүс төгүлүн ыытыллар. Быйыл алтынньы 1-3 күннэригэр тэриллэр, сүрүн тиэмэтэ — үбүлээһини, туризмы уонна тыа хаһаайыстыбатын сайыннарыы көмөтүнэн муниципалитеттар экономикаларын бөҕөргөтүү.
Хаартыска: СӨ Ыччат парламенын пресс-сулууспата
