«Газпром» хампаанньа Владимир Путин көҕүлээбит социальнай гаастааһын бырагырааматын олоххо киллэрэргэ Саха сиригэр 1,8 миллиард солкуобайы ыытарга бэлэм.
Ил Дархан Айсен Николаев хампаанньа бырабылыанньатын бэрэссэдээтэлин солбуйааччы Виталий Маркеловы кытта тустаах дуогабары баттастылар. Кинилэр Петербургтааҕы норуоттар икки ардыларынааҕы гаас форумугар көрүстүлэр.
Маны таһынан «Газпром» хампаанньа «Сибиир күүһэ» гаас турбата ааһар оройуоннарыгар нэһилиэк иһинээҕи уонна нэһилиэктэри холбуур гаас ситимин тардыыга ороскуоту бэйэтигэр ылла. Иннэ гынан, Саха сирин үбүттэн 2,8 миллиард солкуобай кэмчилэнэр.
2020 сыллаахха бырабылыанньа бэрэссэдээтэлэ Алексей Миллер уонна Айсен Николаев «2021-2025 сылларга Саха сиригэр гаастааһыны сайыннарыы» бырагырааматын ылыммыттара. Бырагыраама чэрчитинэн Алдаҥҥа, Ленскэйгэ, Нерюнгрига, Өлүөхүмэҕэ 21 нэһилиэккэ күөх төлөнү ыытарга усулуобуйа тэриллиэҕэ. Ол иһигэр — Алдаҥҥа, Өлүөхүмэҕэ уонна Бэчэнчэ, Мурья, Иенгра, Чульман бөһүөлэктэригэр.
