Горнай улууһугар IT-кииҥҥэ аан бастакытын кибертурнир ыытылынна. Тэрээһин олунньу 16-19 күннэригэр диэри салҕаныа.
Бу турнир улууска биир бастакынан оҕолорго көмпүүтэри үөрэппит, үгүс көлүөнэ дьон убаастабылын ылар математика, информатика предметтарын учуутала, улуус бочуоттаах олохтооҕо Виктор Андреев аатын үйэтитэр сыаллаах тэрилиннэ.
Санатар буоллахха, Бэрдьигэстээх нэһилиэгэр ааспыт сыл эмиэ маннык хабааннаах күрэс ыытыллыбыта.
«Бэрдьигэстээх нэһилиэгин ыччата Николай Корякин киберспорт турнирын тэрийэр этиилээх кэлбитэ. Ону биһиги өйөөммүт, нэһилиэк дьаһалтатын дьиэтин актовай саалатыгар тэрийбиппит. Оонньуулар быһа эфирдэрин YouTube ханаалга тута көрдөрбүттэрэ. Нэһилиэнньэҕэ иһитиннэриини тиэрдэ олорбуттара», — диэтэ нэһилиэк баһылыгын солбуйааччы Ксения Васильева.
Күрэхтэһии түөрт көрүҥүнэн ыытыллар: Counter-Strike, FIFA, Dota 2 уонна PUBG Mobile. Сааһыттан тутулуга суох, уоспайа 100-тэн тахса киһиттэн сайаапка киирбит.
«Бэйэбит дэриэбинэбитигэр турнир бөҕөтө буолааччы. Элбэх киһи кыттааччы. Турнирга төрдүө буолан кэллибит», — диэн Атамай нэһилиэгиттэн кыттар Альберт Аввакумов кэпсээтэ.
Ол курдук, Уус Алдаҥҥа ыытыллар Саха сирин норуоттарын VIII-с Спортивнай оонньуулар бырагырааматыгар киберспорт киирбитэ. Бу оонньуу түмүгүнэн күүстээх спортсменнары сүүмэрдээн, улууска киберспорт федерацията тэриллиэ.
