Кулун тутар 15-17 күннэригэр Россияҕа бэрэсидьиэн быыбара ыытыллаары турар. Бу эппиэтинэстээх хампаанньаҕа бэлэмнэнэн быыбардааччы киэҥ араҥатын хабан, быыбар туһунан сиһилии иһитиннэрэр сыаллаах олунньу 17 күнүттэн кулун тутар 7 күнүгэр «ИнформУИК» диэн анал бырайыак үлэтин саҕалаата.
Горнай улууһугар уопсайа 15 быыбардыыр учаастак баар.
Быыбар хамыыһыйатын учаастагын чилиэннэрэ дьоҥҥо-сэргэҕэ дьиэлэригэр сылдьан мобильнай анал сыһыарыыны, быыбар ыытыллар болдьоҕун, хандьыдааттарын, куоластааһын көрүҥнэрин туһунан сиһилии кэпсииллэр.
Быыбар суолтатын быһаараллар, өйдөтөллөр. Кинилэр анал таҥастаах, суумкалаах, бейджиктээх сылдьан үлэлииллэр. Маныаха биир да хандьыдаат туһугар аҕытаассыйа ыытыллыбат.
