Горнай улууһугар 12 ойуур баһаарын умуруорууга 344 киһи үлэлиир. Бу туһанан СӨ экология министиэристибэтин пресс-сулууспата иһитиннэрэр.
СӨ экология министиэристибэтин, Авиалесоохрана федеральнай резервэтин, ЫБММ үлэһиттэрэ уонна олохтоохтор үлэлииллэр. Ону тэҥэ баһаары умуруорууга 55 тиэхиньикэ туһанылынна.
Ааспыт сууккаҕа уопсайа 125 гектар иэннээх биир ойуур баһаара умуруорулунна. Бу Тыһаҕаччыттан 13,3 килэмиэтир сиргэ баар уоту умуруоруу бэс ыйын 29 күнүттэн саҕаламмыта.
«Сарсыҥҥыттан Горнайга ардаҕы аҕалыыга Ан-26 «Циклон» үлэлиэҕэ», — диэн иһитиннэриигэ этиллэр.
Ону таһынан, Уус Алдаҥҥа Бээрийэ сэлиэнньэтин аттынан биир ойуур баһаарын умуруораллар.
Уот кураанах этиҥтэн барбыт, баһаары умуруоруга 32 авиабаһаарынай, 14 «Якутлесресурс» үлэһитэ, ЫБММ алта үлэһитэ, олохтоох нэһилиэнньэттэн 47 киһи уонна 17 тиэхиньикэ үлэлиир.
Баһаар нэһилиэнньэлээх пууннарга уонна эбийиэктэргэ суоһуур куттал суох диэн бэлиэтииллэр.
