Бу күннэргэ Горнай улууһун олохтоохторо дойду үрдүнэн чөл, доруобай олоҕу көҕүлүүр «Үлэҕэ уонна көмүскэлгэ бэлэм буолуу» нуорматын туттарыы хамсааһыныгар көхтөөхтүк кытталлар.
Горнай улууһун олохтоохторо урукку да кэмнэртэн үлэни спорду өрө тутан үгүс ситиһиилэнэн элбэх биллэр спортсменнары иитэн таһаарда. Бу улууска спорт сайдыытыгар биир ураты болҕомто уурулларын уонна сайдыы сөптөөх суолунан баран иһэрин туоһута. Бу күннэргэ Манчаары оонньууларыгар тутуллубут Чыпчаал стадионугар оҕотуттан оҕонньоругар диэри күүстэрин, тулуурдарын уонна сымсаларын тургутан дойду үрдүнэн ыытыллар хамсааһынна кыттан ГТО нуорматын күргүөмнээн туттардылар.
Нуорманы туттарыыга улуус үгүс тэрилтэлэрэ, нэһилиэктэртэн тиийэ кэлэн кытыннылар. Доруобуйаларынан хааччахтаахтары, кырдьаҕастары көрөр интернат үлэһиттэрэ күргүөмүнэн кэлэн кытыннылар. Кинилэр ортолоругар 64 саастаах Дария Алексеева ситиһиилээхтик кытынна.
Олус көхтөөх эйгэлээх ГТО нуорматын туттарыы бу курдук олохтоохторго сибиэһэй салгыҥҥа, анал былаһааккаҕа тэриллиннэ. Уопсайа 70-ча киһи саастарыттан көрөн биэс спорт көрүҥүн талан ситиһиилээхтик туттарда. Кыттааччылар бэйэ-бэйэлэригэр көмөлөһөллөрө, санааларын көтөҕөллөрө уонна уопуттарынан үллэстэллэрэ хамсааһыны олус сэргэхситтэ.
