Горнай улууһугар 2021 сылга ыытыллыахтаах «Манчаары оонньуулара» спорт национальнай көрүҥнэрин XXI спартакиадатыгар анаан тутуллар саҥа спортивнай комплекс маҥнайгы баҕанатын туруордулар. Бу туһунан СӨ тутууга министиэристибэтин пресс-сулууспата иһитиннэрэр.
Саҥа спортивнай эбийиэк тутуута «Демография» национальнай бырайыак чэрчитинэн ыытыллар. Элбэх хайысхалаах комплекс «Манчаары оонньууларыгар» тутуллар эбийиэктэртэн биирдэстэринэн буолар. Маны таһынан 1000 миэстэлээх стадион уонна 50 миэстэлээх интэринээттээх тир тутуллуохтара.
2 478 квадратнай миэтэрэ иэннээх, икки мэндиэмэннээх дьиэҕэ 400 миэстэлээх трибуналардаах волейбол, минифутбол уонна баскетбол көрүҥнэринэн дьарыктанар саала, бокса саалата, тренажернай саала, судьуйалар, тренердар уонна суруналыыстар хосторо, быраас кэбиниэтэ баар буолуохтара.
Тутуу уопсай сыаната 235 мөлүйүөн солкуобайга тэҥнэһэр, онтон 168,4 мөлүйүөн солкуобай «Демография» национальнай бырайыак иитинэн дойду хааһынатыттан үбүлэнэр.
