Ааспыт нэдиэлэҕэ Дойду Судаарыстыбаннай Думата 2020 сыллааҕы федеральнай бүддьүөт туһунан сокуону үһүс түмүк ааҕыыга ылынна, диэн ТАСС иһитиннэрэр.
Сокуоҥҥа олоҕуран, федеральнай бүддьүөт 2020 сыллааҕы дохуота 20,379 триллион солкуобайга тиийиэ сабаҕаланар, 2021 сылга — 21,246 триллион солкуобайга, оттон 2022 сылга – 220,058 триллион солкуобайга.
Бүддьүөт ороскуота 2020 сылга — 19,503 триллион солкуобайга, 2021 сылга — 20,634 триллион солкуобайга уонна 2022 сылга — 21,763 триллион солкуобайга тиийэ үрдүүрэ күүтүллэр.
Ороскуот улахан өлүүтэ урукку курдук, социальнай хааччыллыыга, көмүскэниигэ уонна судаарыстыбаҕа ис-тас өттүттэн куттал суох буолуутугар көрүллүө.
2020-2022 сылларга Федеральнай бюддьүөт дохуотун ороскуоттан ордор чорбоҕо оҥоһуллубут табаар уонна өҥө сыанатын сөп түбэһиннэрэн 0,8%, 0,5% уонна 02%-ҥа тиийэрэ күүтүллэр.
2020 сылга оҥоһуллан тахсар табаар уонна өҥө сыаната 112,863 триллион солкуобай буолара сабаҕаланар сөп.
Докумуон бүддьүөт быраабылатынан, 2020 сылга Urals маркалаах нефть сыанатыгар (биир баррель — 42,4 доллар) сөп түбэһиннэрэн оҥоһуллубут. Хааһына бу сыананы үрдэтэн ниэби атыылааһынтан киллэрэр эбии дохуота нэһилиэнньэ олоҕун уйгута тупсарыгар угуллуо.
Дойду экономическэй сайдыыга министиэристибэтэ, барыллаан суоттааһынынан, арассыыйаҕа оҥоһуллан тахсар табаар уонна өҥө сыаната 2020 сылга үрдүө уонна 2021, 2022 сылларга 3,1% уонна 3,2%-ҥа тиийэ түргэтиэ.
Суоттаныы түмүгүнэн, нефть сыллааҕы орто сыаната 2020 сылга биир баррель иһин 57 доллар уонна 2021, 2022 сылларга 56 уонна 55 долларга тэҥнэһиэхтэрэ. 2020 сылга табаар уонна өҥө иһин сыана үрдээһинэ 3%, оттон 2021 уонна 2022 сылларга 4% тэҥнэһиэ.
2020-2022 сылларга сайдыы пуондатын муҥутуур кээмэйэ сыл ахсын 585 миллиард солкуобайга тэҥнэһиэ. Бу пуонда үбэ 2019 сылтан дойду судаарыстыбаннай бырагыраамаларын үбүлээһиҥҥэ ыытыллар уонна 2024 сыл бүтүөр диэри үлэлиэҕэ.
Федеральнай бүддьүөт үс инники сылга сүрүн ороскуоттара национальнай бырайыактарга туһуланыахтара. Ол курдук, бырайыакка сэттэ триллион солкуобай ороскуоттаныа. Национальнай бырайыактары үбүлээһин сыллата үрдээн иһиэ – 2020 сылга 1,982 триллион солкуобайга, 2022 сылга 2,692 триллион солкуобайга тиийиэҕэ.
