Госдума дьокутаата Галина Данчикова Үөһээ Бүлүүгэ сырытта. Олохтоохтор саас аайы элбэх уу кэлэн, Бүлүү өрүс кытыла сиҥнэн иһэр диэтилэр. Дьокутаат биэрэги бөҕөргөтүү боппуруоһун атын улуустар эмиэ көтөҕөллөр диэтэ уонна үп миниистирэ Антон Силуановка, экэнэмиичэйскэй сайдыы миниистирэ Максим Решетниковка тустаах суруктары ыыттым диэтэ.
Галина Данчикова Ил Түмэн дьокутаата Феодосия Габышевалыын үөрэх үлэһиттэрин мунньаҕар сырыттылар. Салгыы Данчикова улуус саҥа балыыһатыгар сылдьан үлэ усулуобуйатын бэрэбиэркэлээтэ. Нэһилиэк баһылыктара тыа сирин олохтоохторугар ипотека уонна Бүлүү өрүһү уҥуордуур муоста тутуутун туһунан ыйыталастылар. Дьокутаат бырайыак экспертизаны ааспытын туһунан эттэ. Федеральнай үп көрүллүбүт.
Улуус баһылыга Владимир Поскачин Үөһээ Бүлүү саҥалыы сайдан эрэрин бэлиэтээтэ. Ол курдук национальнай бырайыак чэрчитинэн 2021 сылга уу ситимин тардарга 200 мөл. солк. уонна канализацоннай-ыраастыыр станцияҕа 238 мөл. солк. көрүллүбүтүн туһунан эттэ. Тамалакааҥҥа Галина Данчикова 145 миэстэлээх оҕо уһуйаанын тутуутугар сырытта.
2022 сылга Үөһээ Бүлүүгэ Саха АССР 100 сылын көрсө Олоҥхо ыһыаҕа буолуохтаах. Онно бэлэмнэнэн суол, тырыбына уонна да атын эбийиэктэр тутуллаллар.
