Өрөспүүбүлүкэтээҕи онкологическай диспансер биригээдэтэ Хаҥалас улууһун Сиинэ уонна Үөдэй сэлиэнньэлэригэр 112 киһини көрдө, ол иһигэр 20 элбэх оҕолоох ийэни. Бу туһунан СӨ доруобуйа харыстабылын министиэристибэтин пресс-сулууспата иһитиннэрэр.
Эндоскопист-быраас Иван Яковлев, онко-гинеколог Виктория Николаева, УЗИ бырааһа Игорь Попов, медицина сиэстэрэтэ Александра Корнилова уонна медбрат Егор Осипов үлэлээтилэр.
«Онко-гинеколокка 74 киһи көрдөрдө, УЗИ-ны 99 киһи ааста, фиброгастродуоденоскопияны — 28, бары онкомаркерга анаалыс туттардылар. Уопсайа 112 киһини көрдүбүт, ол иһигэр 20 элбэх оҕолоох ийэни. Сорох дьону салгыы көрдөрөллөрүгэр ыҥырдыбыт», — диэн диспансер сүрүн бырааһын солбуйааччы, онко-хирург Петр Никифоров.
«Онкодесант» аахсыйа чэрчитинэн, медицина исписэлиистэрэ тэйиччи сытар сэлиэнньэ уонна бөһүөлэк дьонун-сэргэтин көрөллөр. Сыала — онкологическай ыарыыттан олохтон туораһыны аҕыйатыы, ыарыыны эрдэ быһаарыы.
