Бүгүҥҥү күҥҥэ Хаҥалас улууһугар баар ойуур баһаарын улахан өттө умуруорулунна. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
Бүгүн, от ыйын 27 күнүгэр, Саха сирин Ил Дархана Айсен Николаев ойуур баһаардарын көтөн көрдө, 25 335 гектар уопсай иэннээх сэттэ сири-уоту умуруорар дьаһаллар ылыллаллар, онтон түөрдэ — «Өлүөнэ очуостара» национальнай паарка территориятыгар баар.
Пааркаҕа баар баһаардары барытын төгүрүйбүттэр, үс уокка умуруоруу үлэтэ бу күннэргэ ыытыллыаҕа. Үлэҕэ 429 киһи уонна 25 тиэхиньикэ үлэлээтэ.
Хаҥалас улууһугар быйыл уопсайа 29 916,5 гектар иэннээх сиргэ 50 ойуур баһаара, ол иһигэр 11 баһаар «Өлүөнэ очуостара» айылҕа пааркатын сиригэр турбута. Уоту утары охсуһууга 1 547 киһи, ол иһигэр 880 киһи уонна 43 тиэхиньикэ күүһэ тардыллыбыта.
«Күннэтэ ойуур баһаардарын балаһыанньата арыый да буолан иһэр. Күн бүгүн биир да баһаар нэһилиэнньэлээх пууннарга кутталы үөскэппэттэр. Ол гынан баран, өрөспүүбүлүкэ арҕаа өттүгэр быһыы-майгы уустук. Сунтаар, Үөһээ Бүлүү, Бүлүү улуустарыгар элбэх баһаар баар. Россия ЫБММ уонна Оборона министиэристибэлэрин көмөлөрүнэн, баһаардарын бохсууга көдьүүстээх үлэ ыытыллар», — диэтэ Ил Дархан.
Бүгүҥҥү туругунан өрөспүүбүлүкэҕэ 135 ойуур баһаара баар. Ааспыт сууккаҕа 350 тыһ. гектардаах 34 баһаар умуруорулунна. Уоту утары охсуһууга 1800 киһи үлэлиир, ол иһигэр федеральнай саппаастан 600 үлэһит.
Айсен Николаев иһитиннэрбитинэн, РФ айылҕа ресурсаларыгар уонна экологияҕа миниистирэ Александр Козлов Рослесхоз салалтатыгар Саха сиригэр эбии дэлби тэптэриилэр кээмэйдэрин ыытарга сорудахтаата. Ону Нам уонна Кэбээйи оройуоннарыгар минерализованнай балаһалары оҥорууга туттуохтара.
