Бэрэсэдьиэн Владимир Путин көҕүлээбит «Куттала суох уонна хаачыстыбалаах айан суоллара» национальнай бырайыак чэрчитинэн, Өктөм-Төхтүр учаастагын 53-с килэмиэтиригэр «Умнас» айан суолугар өрөмүөн үлэтэ ыытыллар. Бу туһунан оройуон пресс-сулууспата иһитиннэрэ.
«Билиҥҥи туругунан, асфальт ууруута түмүктэннэ, маны таһынан суол кытыытынааҕы сир эниэтин оҥоһуутун былааннааһын үлэтэ ыытыллар», — диэтэ Хаҥалас улууһун баһылыга Олег Иринеев.
Бырайыакка биэс турба уларыйыыта уонна суол сорох учаастагын кэтирэтии үлэтэ киирэр. Суол өрөмүөнэ алтынньы ый түмүктэниитэ бүтэрэ былааннанар.
«2020-2024 сылларга Саха сирин тырааныспарын комплексын сайыннарыы» бырагырааманан уонна «Куттала суох уонна хаачыстыбалаах айан суола» национальнай бырайыак чэрчитинэн 2020 сылга Хаҥалас улууһугар 30 килэмиэтир уһуннаах суол өрөмүөннэнэр.
