Хабаровскайга алтынньы 1-4 күннэригэр «Анимур» диэн норуоттар икки ардыларынааҕы анимационнай киинэ бэһис төгүлүн ыытыллар бэстибээлэ буолуоҕа. Үбүлүөйдээх сезоҥҥа дьыалабыай бырагыраамаҕа аан бастаан Россия уонна АСЕАН 11 дойдутун икки ардыларыгар копродукцияны уонна тарҕатыыны сайыннарар аналлаах ASEAN–Russia Animation Market — идэтийбит форум баар буолуоҕа.
Форумҥа устуудьуйалар, продюсердар, дистрибьютордар, платформалар, үөрэхтээһин тэрилтэлэрэ уонна өйөбүл институттара, телеханааллар уонна сыыппара платформалара, оҕо уонна дьиэ кэргэн контеныгар эспиэрдэр, инвестордар ыҥырылыннылар. ASEAN–Russia Animation Market кыттыылаахтарынан Бруней, Вьетнам, Илин Тимор, Индонезия, Камбоджа, Лаос, Малайзия, Мьянма, Сингапур, Таиланд, Филиппины уонна Россия бэрэстэбиитэллэрэ буолаллара күүтүллэр.
Дьыалабыай бырагыраама чэрчитинэн кыттыылаахтары күүтэр:
- былаас уорганнара, Россия Анимационнай киинэтин ассоциацията уонна сайдыы института кыттыылаах төгүрүк остуол;
- Россия уонна АСЕАН дойдуларын медиа-индустриятын билиһиннэрии;
- копродукцияҕа, тарҕатыыга, IP, оҕо контеныгар, AI уонна үөрэхтээһиҥҥэ анаммыт тиэмэлэринэн сиэссийэлэр;
- АСЕАН дойдуларын анимациятын анал көрдөрүүлэрэ;
- Россия уонна АСЕАН дойдуларын анимацияларын устуоруйатын быыстапката;
- уопут атастаһыытыгар уонна нетворкиҥҥа аналлаах икки тыллаах идэтийбит платформаны саҕалааһын. Ону таһынан B2B көрсүһүүлэр, официальнайа суох приемнар уонна култуура бырагыраамата былааннаналлар.
Форум АСЕАН Секретариата, Россия Федерациятын Экэниэмикэ сайдыытын министиэристибэтэ уонна Россия Анимационнай киинэтин ассоциацията өйөбүллэринэн олоххо киирэр, итиэннэ «ASEAN-Russia Animation Connect» бырайыак сүрүн офлайн-тэрээһининэн буолар. Хабаровскайга партнерунан V «Анимур» норуоттар икки ардыларынааҕы анимационнай киинэ бэстибээлэ буолар, кини форуму идэтийбит былаһаакканан, көрөөччүлэр аудиторияларынан уонна Азиатскай-Тихоокеанскай региоҥҥа анимация сүрүн көрүүлэриттэн биирдэстэрин ыытыы элбэх сыллардаах уопутунан хааччыйыаҕа.
