Бүгүн Хатас уонна Павловскай хайысханан сабыылаах муус суолугар таһаҕастаах КамАЗ массыына өрүскэ түспүтүн туһунан СӨ тырааныспар министиэристибэтэ иһитиннэрэр.
Суоппар куотан тахсыбыт, эмсэҕэлээбэтэх.
СӨ тырааныспар министиэристибэтэ өрөспүүбүлүкэҕэ кыһыҥҥы суолунан сырыы түмүктэммитин санатар. Билигин биир эрэ кыһыҥҥы суол үлэлиир – Уус Куйга – Хаһааччыйа – Кириэстээх. Ыам ыйын 10 күнүгэр диэри сабыллара былааннанар.
Билиҥҥи туругунан ханнык баҕарар тырааныспар мууска тахсара кытаанахтык бобуллар. Кэһэр түгэҥҥэ суоппардар административнай эппиэккэ тардыллаллар. Ыстараап суумата – 3-5 тыһ. Дуоһунастаах дьон 20 тыһ. солкуобайтан 50 тыһ. солкуобайга диэри ыстарааптаналлар. Оттон тэрилтэлэргэ – 100 тыһ. солкуобайтан мөлүйүөҥҥэ диэри.
