Николай Самсонов аатынан өрөспүүбүлүкэ баһылыгын бириэмийэтинэн нуучча тылын үөрэтиигэ уонна сайыннарыыга кылаатын иһин ХИФУ филологическай факультетын журналистика кафедратын доцена Лена Павлова наҕараадаланна. Бу туһунан үрдүк үөрэх кыһатын пресс-сулууспата иһитиннэрэр.
ХИФУ доцена тыл сайдыытын, суруналыыс тиэкиһин истиилин уонна бэчээттээн таһаарыы жанрын тутулун чинчийиинэн дьарыктанар. Кини этэринэн, бу наҕараада нуучча тылын үөрэтии уопсай дьыалатыгар өҥөнү эбэтэр кылааты билинии эрэ буолбатах, улахан эппиэтинэһи сүгүү буолар.
«Бу бириэмийэни ыламмын, олус үрдүк ирдэбиллэргэ эппиэттиир эбээһинэскэ тигистим. Миэхэ бу саамай үрдүк сыанабыл, Николай Самсонов учуонайы убаастыыбын, кини муударай учуутал уонна бэриниилээх киһи», – диэн Лена Павлова эттэ.
Доцент ХИФУ пресс-сулууспатыгар профессорга үөрэммитин эрэ буолбакка, кинини кытта биир факультекка үлэлэспитин кэпсээтэ.
«Мин кинини научнай үлэҕэ, салайааччынан уонна уопсастыбаннай үлэһит быһыытынан көрбүтүм. Сэрии бэтэрээнэ, учуонай, кини аатын аан дойду славистикатыгар биллэр, учуутал, көрдөөх уонна сүрдээх дьаныардаах киһи этэ. Кини кытаанах уонна ирдэбиллээх быһыыта үтүөтүн кытта дьүөрэлэһэллэрэ – учуутал тус хаачыстыбатын муҥутуур үчүгэй өрүттэрэ», – диэн эттэ.
Лена Павлова бэлиэтииринэн, тыл киһиэхэ олохсуйар уонна кинилиин тэҥҥэ уларыйар.
«Бу аан дойду үс гыммыт биирин түмэргэ тылга сөптөөх нуорма. Цифровизация, биллэн турар, тыл бары таһымыгар трансформация тэтимэ түргэтээтэ. Кылаабынайа, кини кэрэтин сыаналаан, хоһоон, проза суруйан, ыраас буоларыгар бары сырабытын ууран, оҕолору иитэн-үөрэтэн, сүүһүнэн мөлүйүөн дьоҥҥо өйдөнөр, бу тыл көмөтүнэн биһиги санаабытын, быһыыбытын-майгыбытын тиэрдэр кыах баарыгар өбүгэлэрбитигэр махтанабыт», — диэн ФЛФ доцена эбэн эттэ.
Литература, опернай, ойуулуур-дьүһүннүүр искусство, нуучча тылын бастыҥ холобурдарын тутуһар предметтэр уонна нуучча тылынан ыраастык саҥарар дьон баарыгар глобализация, эдэр дьон эксперименнара, омук тылыттан киириилэр тылга кутталы үөскэппэт диэн бэлиэтиир.
«Тыл билигин сайдар, байар уонна хомоҕой буолар. Оттон биһиги сорукпут-тылга тапталы уонна кини баайын харыстыыр кыаҕын үөскэтии», — диэн чинчийээччи түмүктээтэ.
