Хотугулуу-Илиҥҥи федеральнай үнүбэрсиэккэ устудьуоннары үөрэххэ онлайн көрүҥүнэн ылыы систиэмэтэ докумуон көрүллэригэр ордук табыгастааҕын туһунан үрдүк үөрэх кыһатын ректора Анатолий Николаев иһитиннэрдэ.
«Туттарсааччы докумуоннарын тус кэбиниэтигэр онлайн көрүҥүнэн ыытар кэмигэр, тутар хамыыһыйа докумуоннары наардаабакка, сканирование оҥорбокко көрөн барар», — диэтэ кини.
Маны таһынан, докумуону маннык туттарыы туттарсааччы харчытын харыстыыр.
«Дьокуускайга диэри айан сыаната, холобур, хотугу улуустартан көтөн кэлии 25-тэн 35 тыһыынчаҕа диэри халбаҥныыр. Онтон Госуслуга, эбэтэр электроннай почта нөҥүө докумуонун ыытарыгар бэйэтин төлөпүөнэ эрэ наада», — диэн кини бэлиэтээтэ.
Ону тэҥэ, Анатолий Николаев 2021 сылга ХИФУ бакалавриат, магистратура уонна специалитет бырагыраамаларынан 3,6 тыһыынча бүддьүөт миэстэтин аһары былаанныырын иһитиннэрдэ. Үрдүк үөрэх колледжтарыгар ылыы куонкуруһунан быһаарыллыаҕа.
Ол курдук, инфраструктурнай технологиялар колледжтарыгар 2020 сылга 240 бүддьүөт миэстэтэ көрүлүннэ. Россия 50 бастыҥ орто анал үөрэхтэрин ахсааныгар киирэн, ИТК статуһун бигэргэттэҕинэ бүддьүөт миэстэтэ 290 буолуон сөп.
