Дойду бэрэсидьиэнэ Владимир Путин Петербургтааҕы норуоттар икки ардыларынааҕы экономическэй форум (ПМЭФ-2024) пленарнай мунньахха дойду экономическэй сайдыытын бырагырааматын кытта билиһиннэрдэ. Кини анал болҕомтону Уһук Илин сайдыытыгар уурбут.
Ил Дархан Айсен Николаев бэлиэтииринэн, РФ Судаарыстыбанай сэбиэтин иитинэн Хотугу байҕал суолун уонна Арктикатааҕы регионнарын сайдыыларын туһунан сонуну үөрэ истибит. Хотугу байҕал суолунан сылга 150 мөл туоннаҕа диэри таһаҕас кээмэйэ элбээтэҕинэ бу сайдыы хайысхата улахан кыахтааҕын көрдөрүө диэн кини эттэ.
«Бэрэсидьиэн Арктика сайдыытыгар болҕомтото Саха сирэ сайдарыгар саҥа тирэхтэри үөскэтэр. Тиксии-Найба агломерацията Хотугу Байҕалга Саха сирин тирэх пууна буолар. Бу өрөспүүбүлүкэ экономикатыгар сайдар кыаҕы биэриэҕэ. Ону тэҥэ Тиксии дойдуга куттала суох балаһыанньаны хааччыйарга дьоһуннаах оруолу толорор», — диэн Айсен Николаев эттэ.
Ону тэҥэ кини Найбаҕа дириҥ байҕаллааҕы пуорт тутуута көмүстээх, эриэккэс тимирдэрдээх сирдэри туһанарга көмөлөһүө диэн ыйда.
«Найбаҕа пуорт тутуута Күчүстээҕи бырамыысалыннас кластерыгар таһаҕаһы таһарга кыаҕы үөскэтэр. Кластерга 100 туоннаттан тахса көмүстээх сири хостооһун саҕаланан эрэр. Бу бырайыак Саха сирин уонна дойду экономикатыгар улахан кылааты олохтуоҕа», — диэтэ Айсен Николаев.
Ону таһынан, өрөспүүбүлүкэҕэ Арктикатааҕы зонаҕа дьон-сэргэ тупсаҕайдык олорорун курдук улахан болҕомто ууруллар. Онно анаан Саха сиригэр «Тиксии-Найба» агломерациятын маастар-былаанын оҥороллоро бэлиэтэнэр. Бырайыак чэрчитинэн уопсастыбаннай сирдэри уонна уулуссалары тупсарары, уунан хааччыйар систиэмэтин тутуутун, хаарбах дьиэттэн көһөрүүнү былааннаатылар.
Ону тэҥэ Найбаҕа социальнай хайысха эбийиэктэрин саҥардытыахтара. Ол курдук, балыыһалары, үлэһиттэри бэлэмниир үөрэх кластерын, култуурунай киини уонна спортивнай комплексы.
Айсен Николаев бэлиэтииринэн, Судаарыстыбаннай Сэбиэккэ Хотугулуу байаҕал суолун уонна Арктикатааҕы регионнар сайдыыларын хамыыһыйата оҥоһуллара Саха сирин Арктикатыгар кытта саҥа кыахтары арыйыа.
Хаартыска: Ил Дархан Айсен Николаев телеграм-ханаала
