Өрөспүүбүлүкэ киин куоратыгар тумуулаабыт дьон ахсаана 24 %-нан намтаата. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
«Тумуу туруутугар хааччахтыыр миэрэ ылыллыбыта үчүгэй түмүктээх буолла», — диэн доруобуйа харыстабылын миниистирэ Елена Борисова эттэ.
ОРВИ-нан уонна гириибинэн ыалдьан балыыһаҕа 96 киһи киирбитэ бэлиэтэнэр.
«Дьон элбэхтик парагириип уонна араас риновируснай инфекцияттан ыалдьаллар. Бу тумуу кэмигэр бэлиэ көстүү буолар», — диэтэ кини.
Росздравнадзор Саха сирин доруобуйа харыстабылын министиэристибэтин кытта медицинскэй мааска сыанатын хонтуроллууллар. Саха сирин үрдүнэн 450 тыһыынчаттан тахса мааска баара бэлиэтэнэр.
