Ахсынньы ый 11 күнүгэр «Халыма» айан суолугар Чурапчы сэлиэнньэтиттэн 170 килэмиэтирдээх сиргэ эр киһини түҥнэри көттүлэр. Бу туһунан суолга куттал суох буолуутун судаарыстыбаннай инспекцията иһитиннэрдэ.
«Тойота Аллион массыына суоппара 58 саастаах эр киһини үрдүнэн тэпсэн ааста. Эмсэҕэлээбит киһини ыарахан туруктаах балыыһаҕа тиксэрдилэр. Аҕыйах бириэмэ буолан баран эр киһи өйүгэр кэлбэккэ тыына быһынна»,-диэн этиллэр.
Инники этллибитинэн, эр киһи айан суолугар сытара.
Суоппар этиитинэн, айаннаан иһэн суолга турар массыына уотун көрбүт уонна бэйэтин фаратын уотун аччаппыт. Массыынаҕа чугаһаан баран, суол ортотугар сытар киһини көрбүт. Түргэнник кыайан тохтообокко, эр киһини үрдүнэн барбыт.
Медицинскэй туоһулааһын көрдөрүүтүнэн суоппар арыгы испэтэҕин бигэргэттилэр. Судебынай-медицинскэй экспертиза өлбүт киһи хааныгар арыгы баарын быһаарыахтаах. Суоппар этиитинэн, эчэйбит киһини тиэйэллэригэр сиэбиттэн икки бытыылка буокканы булбуттар.
Кэнники биллибитинэн, тохтоон турбут массыына аттыттан үс киһи «Тойота Аллион» суоппарыгар далбаатыы сатаабыттар, ону суоппар өйдөөн көрбөтөх.
