«Майтона» уонна «Индрайвер» IT-хампаанньалар өрөспүүбүлүкэ балыыһаларыгар киһи тыҥатын үлэлэтэр аппараттары ылыыга 45 мөлүйүөн солкуобайы тириэрдиэхтэрэ. Бу туһунан Ил Дархан Айсен Николаев бэйэтин Instagram аккаунугар иһитиннэрдэ.
«Саха IT-бизнеһа социальнай эппиэтинэстээх буолуу бэрт үчүгэй холобурун көрдөрдө. «Майтона», «Индрайвер» хампаанньалар уонна Арсен Томскай тус бэйэтэ Саха сирин улуустарын уонна Дьокуускай куорат балыыһаларыгар коронавирус ыарыытын утары охсуһууга диэн киһи тыҥатын үлэлэтэр аппараттары ылыыга уопсайа 45 мөлүйүөн солкуобайы тириэрдиэхтэрэ», — диэн Айсен Николаев эттэ.
Бу быһыы Саха сирин олохтоохторун доруобуйаларын уонна олохторун харыстааһыҥҥа чахчы сүдү суолталаах көмө буоларын Ил Дархан бэлиэтээтэ.
