Саха сирин биатлонистара Уһук Илиҥҥи уокурук бастыыр иһин күрэхтэһиитигэр 2003-2004 сыллаах төрүөх спортсменнар ыккардыларыгар хас да мэтээлинэн наҕараадаланнылар. Күрэхтэһии Петропавловск-Камчатскай куоракка ааста.
Кыайыы иһин 10 Саха сирин спортсмена 16-17 саастаахтар бөлөхтөрүгэр тус бэйэлэрэ уонна хамаанданан күрэхтэстилэр. Саха сирин хамаандатыгар биэс кыыс уонна биэс уол кыттыыны ылла диэн хайыһар спордугар олимпийскай эрэллэри бэлэмниир оҕо-юношескай оскуолатын дириэктэрэ Михаил Чугунов кэпсээтэ.
«Маҥнайгы күҥҥэ биирдиилээн сырсыыга уолаттар 15 килэмиэтири, кыргыттар 12 килэмиэтири сүүрдүлэр. Үһүс миэстэни уолаттарга Александр Процук, кыргыттарга Регина Петрова ыллылар. Спортсменнар иккиэн Нерюнгри оройуонуттан сылдьаллар», — диэн Михаил Чугунов эттэ.
Маны таһынан саха биатлонистара спринт көрүҥҥэ ситиһиилээхтик кытыннылар. Бастакы миэстэни Николай Максимов, иккис миэстэни Александр Процук ыллылар.
«Кыргыттар истэригэр иккис миэстэҕэ Регина Петрова таҕыста. Кини хоппут кыыска 0,02 сөкүүндэнэн кыайтарда», — диэн Михаил Чугунов бэлиэтээтэ.
Күрэх призердара кулун тутар ыйга Красонярскайга ыытыллар спартакиада финалыгар кыттыахтара.
