Хаҥалас улууһун Чапаево сэлиэнньэтигэр алтынньы 31 күнүттэн сэтинньи 3 күнүгэр диэри буолар II-с өрөспүүбүлүкэтээҕи «Николаев форума: патриотизм уонна үөрэҕирии» тэрээһин ыытыллыаҕа. Киэҥ хабааннаах тэрээһиҥҥэ Саха сирин бары улуустарыттан эдэр исписэлиистэр кыттыыны ылыахтарын сөп. Сайаапканы алтынньы 15 күнүгэр диэри туталлар. Форум түмүгүнэн кыайыылаахтар дойду бастыҥ үөрэх кыһаларыгар үөрэтиини ааһыахтара.
Форум Ил Түмэн иһинэн үлэлиир Ыччат парламенын көҕүлээһининэн тэриллэр. Тэрээһин өрөспүүбүлүкэҕэ үөрэтэр-сырдатар бырайыактар нөҥүө патриотическай иитиини тарҕатар сыаллаах.
Ил Түмэн иһинэн үлэлиир Ыччат парламенын бэрэссэдээтэлэ Антон Васильев этэринэн, Николаев форума Саха Өрөспүүбүлүкэтин бастакы бэрэсидьиэнэ Михаил Николаев аатын үйэтитэр бырайыак кини бастыҥ идиэйэлэрин уонна бырайыактарын саҥа көлүөнэҕэ тиэрдии буолар.
«Ааспыт сылга Николаев форума олус ситиһиилээхтик ыытыллыбыта. Саха сирин социальнай уонна экономическай сайдыытын стратегиятыгар сөптөөх этиилэр кыттааччылартан киирбиттэрэ. Кыттааччылартан, экспердэртэн уһулуччу үчүгэй сыанабылы ылан форуму сыл аайы тэрийэр гына быһаарыммыппыт. Манна биһиги өрөспүүбүлүкэбит инникитин туһугар саҥа бырайыактары оҥорон таһаарабыт. Быйылгы форумҥа ыччат төрөөбүт дойдутун олоҕор көхтөөх кыттыытыгар, национальнай сыаннастары бөҕөргөтүүгэ уонна гражданскай эппиэтинэһи сайыннарыыга улахан болҕомто ууруллуоҕа. Кыттааччылар форумҥа патриотическай иитии көмөтүнэн үөрэтэр-сырдатар бырайыактары толкуйдуохтара», — диэн Антон Васильев кэпсээтэ.
Форум кыттааччылара үөрэтэр-сырдатар бырайыактарын оҥороллоругар үөрэх бырагыраамата ыытыллыаҕа. Ону таһынан, форумҥа федеральнай экспертар кэлэн семинардары ыытыахтара. Николаев форумун көмөтүнэн эдэр ыччат Саха Өрөспүүбүлүкэтин судаарыстыбаннай былааһын ситэриилээх уорганнарын бэрэстэбиитэллэрин, биисинэс-түмсүүлэри уонна өрөспүүбүлүкэ академическай хайысхатын кытары билсиэн сөптөөх платформа буолар.
Форумҥа кыттарга сайаапканы бу сигэнэн алтынньы 15 күнүгэр диэри туталлар. Форум түмүгүнэн кыайыылаахтар дойду бастыҥ үөрэх кыһаларыгар үөрэтиини ааһыахтара.
Ил Түмэн иһинэн үлэлиир Ыччат парламенын ВКонтакте бөлөҕөр уонна Телеграм ханаалыгар иһитиннэриилэр, биллэриилэр тахсаллар.
Санатар буоллахха, 2023 сыллааҕы Николаев форума СӨ бастакы бэрэсидьиэнэ Михаил Николаев кэриэһигэр анаммыта. Форумҥа уопсайа 30 оройуонтан 70-тан тахса кыттааччы уонна эксперт кыттыыны ылбыта. 1-кы Николаев форумун түмүгүнэн кыттааччылар Саха сирин социальнай-экономическай сайдыытын стратегиятыгар бэйэлэрин этиилэрин киллэрбиттэрэ.
Саха Өрөспүүбүлүкэтин бастакы бэрэсидьиэнэ Михаил Николаев аатын үйэтитэр 2-с Николаевскай форум Иркутскайдааҕы ньиэп хампаанньатын, «Саха сирин тимир суоллара акционернай хампаанньа» АУо, «Анаабыр алмаастара» АУо, СӨ бастакы бэрэсидьиэнин пуондатын өйөбүлүнэн ыытыллар.
Информационнай партнердар: НВК «Саха», «Якутия 24», «РИИХ Сахамедиа» АУо, ЯСИА, Якутия Daily, Саха Сирэ, ГАУ РС(Я) «Сахапечать», Ulus Media.
