Бүгүн, сэтинньи 4 күнүгэр, Өрөспүүбүлүкэтээҕи медиакииҥҥэ «Народ и армия едины» III өрөспүүбүлүкэтээҕи фашизмы утары ыытыллар форум тэрийээччилэрэ быйылгы кыттыылаахтарга тугу бэлэмнээбиттэрин кэпсээтилэр.
«Биһиги Россиябыт историяны көрдөххө урут-уруккуттан фашизмы утарсар хамсааһыны салайар. Антифашистскай форум өйдөбүлү эрэ хаалларыыга тэриллэр буолбатах, дойдуга бэриниилээх буолууга ыытыллар улахан үлэни бөҕөргөтөр. Патриотическай үлэ дойду үрдүнэн уонна биһиги өрөспүүбүлүкэбитигэр кыайыыны чугаһатарга анаан ыытыллар. Байыаннай күүс өттүгэр фашистар хоттордохторуна даҕаны син биир бу утарсыыларын тохтотуохтара суоҕа. Онон биһиги Кыайыы да кэнниттэн элбэх үлэни оҥоруохтаахпыт — ким да биһиги дойдубут утары сэрии сэбин эмиэ тутар санааламматын курдук», — диэн РФ Бэрэсидьиэнин иһинэн Саха Өрөспүүбүлүкэтин Бастайааннай бэрэстэбиитэлэ Андрей Федотов эттэ.
Кини бэлиэтииринэн, III өрөспүүбүлүкэтээҕи антифашистскай форум чэрчитинэн, бүгүн, сэтинньи 4 күнүгэр, Дьокуускайга күнүс 14:00 чаастан миитиҥ буолуоҕа. Миитиҥ куруутун үлэлиир РФ Сэбилэниилээх күүстэрин тиэхиньикэтин уонна бронетиэхиньикэтин быыстапкатын арыллыытыгар ананар. Ону тэҥэ бүгүн «Россия – Моя история» историческай пааркаҕа «Память о подвиге» диэн Хабаровскай куорат Илиҥҥи байыаннай уокуругун офицердарын дьиэлэрин Байыаннай-Историческай түмэлин (саалатын) пуондатыттан ураты быыстапка арыллыаҕа. Бу экспозиция Уһук Илин олохтоохторо Иккис аан дойдутааҕы сэриигэ, фашизмы утары охсуһууга киллэрбит кылааттарыгар ананар.
Илиҥҥи байыаннай уокурук командующайын солбуйааччы генерал-лейтенант Роман Греков бэлиэтииринэн, форумҥа бэлэмнэниигэ Саха сирин кытта сибээһи биир да күн быспатахтар.
«Илиҥҥи байыаннай уокурук СӨ Ил Дарханын Айсен Николаевтыын уонна өрөспүүбүлүкэ салалтатын кытта бары хайысхаларынан бииргэ күүскэ үлэлиир. Бу, бастатан туран, байыастар дьиэ кэргэттэрин өйүүр, федеральнай өҥөлөрү хонтуруоллуур уонна олоххо киллэрэр үлэ буолар. Улахан болҕомтону байыаннай-техническэй боппуруостарга уурабыт. Саха сирэ фроҥҥа улахан көмөнү оҥороругар билим уонна оҥорон таһаарар кыаҕа барыта баар. Өрөспүүбүлүкэ суһал балаһыанньаҕа уонна саҥаттан саҥа үөскээн иһэр уустуктарга түргэнник эппиэттиир. Аармыйаҕа көмөлөрүн иһин уонна биһиги уопсай дьыалабытыгар кылааттарын иһин Саха сиригэр махтанабыт», – диэн генерал-лейтенант Греков эттэ.
Ону тэҥэ кини анал байыаннай дьайыыга Саха сирин тирэх пууннара киллэрэр кылааттарын бэлиэтээтэ.
«Тирэх пууннар бүгүҥҥү күҥҥэ Саха сириттэн фроҥҥа таһаҕаһы эрэ тиэрдэр кыахтаах буолбатахтар, байыастарга анаан тиэхиньикэни өрөмүөннүүр уонна саҥардан биэрэр кыахтаах тэрилтэ буоллулар», – диэн Греков эттэ.
III өрөспүүбүлүкэтээҕи антифашистскай форум «Народ и армия едины» Дьокуускайга сэтинньи 4-6 күннэригэр ыытыллыаҕа. Форум былаһааккаларыгар анал байыаннай дьайыы кыттыылаахтара, бэтэрээн, ыччат уонна уопсастыбаннай тэриллиилэр бэрэстэбиитэллэрэ түмсүөхтэрэ. Үүнэр көлүөнэни уонна ыччаты дойдуга бэриниилээх буолууга иитэр сыаллаах тэрээһиҥҥэ аныгы фашизмы утарсар боппуруостары ырытыахтара. III өрөспүүбүлүкэтээҕи антифашистскай форум «Народ и армия едины» (Росмолодежь) ыччат дьыалаларыгар федеральнай ааҕыныстыба өйөбүлүнэн «Ыччат уонна оҕолор» национальнай бырайыак иитинэн «Регион для молодых» РФ субъектарыгар ыччат бэлиитикэтин сайыннарар бырагыраама чэрчитинэн ыытыллар.
Хаартыска: Денис Попов / Сахамедиа
