Ахсынньы 15 күнүгэр, Ленинград блокадатын кыттыылааҕар, билигин Ленскэй оройуон олохтооҕор, Нина Федоровна Ягнышеваҕа, Ил Дархан Айсен Николаев @nikolaev_aisen аатыттан бэлэх туттардылар. Бу туһунан Ленскэй оройуон дьаһалтатын пресс-сулууспата иһитиннэрэр.
Маны таһынан бэтэрээннэр Сүбэлэрин аатыттан эмиэ минньигэс бэлэх тутта. Сэрии саҕаланыыта кини оҕо этэ.
«Кини улахан дьон уонна оҕолор, олор истэригэр кыра балтыта суорума суолламмыттарын илэ хараҕынан көрбүтэ. Нина Федоровна ол алдьархайдаах кэмнэри саныан баҕарбат. Кини хаһан да куһаҕаны санаабат — барыта этэҥҥэ, доруобуйа кэминэн, ол гынан баран коронавирус пандемиятыттан дьиэҕэ өрүү олорорго күһэллэбин», — диэн иһитиннэриигэ этиллэр.
Саҥа дьыл чугаһаан эрэринэн Айсен Николаев сэрии бэтэрээннэригэр уонна Ленинград блокадатын кыттыылаахтарыгар бырааһынньыктааҕы бородууктаны түмэн бэлэх биэрдэ.
Бу өрөбүллэргэ Ил Дархантан Ленскэйгэ икки бэлэх кэллэ. Биир бэлэх Аҕа дойду Улуу сэриитин бэтэрээнигэр Иннокентий Феоктистович Симухиҥҥа аадырыстаммыта. Ол эрэн Иннокентий Симухин бу күн иннинэ олохтон туораата. Бэлэҕи бэтэрээн аймахтарыгар туттардылар.
