Күндү култуура хайысхатын үлэһиттэрэ, бэтэрээннэрэ!
Эһигини Саха Өрөспүүбүлүкэтин салалтатын аатыттан Россия култууратын үлэһиттэрин күнүнэн эҕэрдэлиибин!
Биһиги өрөспүүбүлүкэбитигэр тыйаатырдарга, мусуойдарга, кулууптарга, библиотекаларга, Олоҥхо дьиэлэригэр, киинэ хампаанньаларга уонна атын култуура тэрилтэлэригэр 10 тыһыынча кэриҥэ киһи үлэлиир. Кинилэр биһиги ураты култуурабыт төрүт үгэһин оннунан хаалларарга бары күүстэрин, айар куттарын биэрэллэр.
Бу күн култуура эйгэтигэр сыһыаннаах дьону барыларын сыралаах үлэлэрин иһин бэлиэтиэхпин баҕарабын. Саха сирин айар бырайыактара Россиятааҕы уонна норуоттар икки ардыларынааҕы таһымнарга биһирэбили ылбытарыттан киэн туттабыт.
Бүгүҥҥү күҥҥэ куораттарга, сэлиэнньэлэргэ «Культура» национальнай бырайыак тэрээһиннэрэ олоххо киирэллэр, аныгы инфраструктура сайдар.
Бүтэһик сылларга биһиги өрөспүүбүлүкэбитигэр 45 саҥа култуура эбийиэгин үлэҕэ киллэрбиппит.
Саха сирэ киинэ бородууксуйатын оҥорон таһаарыыга регионнар ортолоругар инники күөҥҥэ сылдьар, Москва уонна Санкт-Петербург кэннилэриттэн иһэр. Россия регионнарын Дельфийскай рейтиҥар тохсус миэстэҕэ сылдьар.
Биир кэлим систиэмэнэн Олоҥхо дьиэлэрэ тутуллаллар, ону тэҥэ олоҥхоһуттарга, оһуохайдьыттарга, уустарга бастакытын ыйдааҕы истипиэндийэ көрүлүннэ. Кинематографияны судаарыстыба өттүттэн өйүүргэ регионнааҕы сокуон ылылынна. Ыам ыйын 21 күнүгэр өрөспүүбүлүкэҕэ Ырыа күнэ бэлиэтэнэр.
Өрөспүүбүлүкэҕэ ыччат, аҕам саастаахтар бэйэлэрин талааннарын, айар куттарын киэҥ эйгэҕэ арыйаллар.
Убаастабыллаах култуура үлэһиттэрэ, эһиэхэ айымньылаах үлэҕитигэр ситиһиилэри, кытаанах доруобуйаны уонна дьиэ кэргэҥҥитигэр этэҥҥэ буолууну баҕарабын.
