Ил Дархан Айсен Николаев, бүгүн, балаҕан ыйын 3 күнүгэр, «Кыайыы дьыктаана» аахсыйаҕа кытынна. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Айсен Николаев сэттэ мүнүүтэ иһигэр 25 ыйытыкка барытыгар эппиэттээтэ. Кини дьыктааны өрөспүүбүлүкэтээҕи национальнай библиотека5а суруйда.
«Дойдубут историятын куһаҕана суохтук билэбин. Биир ыйытыкка саарбахтаан ыллым. Атыттарга барытыгар сөптөөх эппиэти биэрдим дии саныыбын», — диэтэ өрөспүүбүлүкэ баһылыга.
«Кыайыы дьыктаана» историческай аахсыйа кыттыылаахтара 45 мүнүүтэ иһигэр 25 ыйытыкка эппиэттээтилэр. 20 ыйытык Аҕа дойду Улуу сэриитин туһунан, биэс ыйытык байыаннай тиэмэҕэ ананна.
«Улуу Кыайыы биьиги дойдубутугар Ытык өйдебүллээх. Хомойуох иһин, билигин, Аан дойдуга историяны уларыта сатыыр күүстэр бааллар. Биллэн туран, барыта бэйэбититтэн тутулуктаах. Бу түгэҥҥэ харахпытын быһа симэрбит табыллыбат. Онон дьыктааҥҥа кыттыы дойду историятын билэргэ улахан суолталаах», — диэтэ Айсен Николаев.
Быйыл «Кыайыы дьыктаана» РФ 85 регионун 7500 былаһааккатыгар ыытыллар. Маны таһынан, аахсыйаҕа 75 атын судаарыстыба кытынна. Тэрийээччилэр сыаналыылларынан, аахсыйа кыттааччыларын ахсаана мөлүйүөҥҥэ тиийиэҕэ. Өрөспүүбүлүкэҕэ дьыктаан 142 былаһааккаҕа сурулунна.
Санатар буоллахха, «Кыайыы дьыктааныгар» 10 тыһыынчаттан тахса өрөспүүбүлүкэ олохтооҕо кыттара былааннаммыта.
