Ил Дархан Айсен Николаев «Армия-2024» норуоттар икки ардыларынааҕы байыаннай-техническэй пуорум үлэтигэр кыттыыны ылар. Пуорум атырдьах ыйын 12 күнүгэр «Патриот» култуура уонна сынньалаҥ байыаннай-патриотическай пааркатыгар саҕаламмыта.
Айсен Николаев пуорум быыстапкатын кытта билистэ. Быыстапкаҕа анал байыаннай дьайыы ирдэбилигэр эппиэттиир РФ Сэбилэниилээх Күүстэрин аныгы сэптэрин-сэбиргэллэрин, тиэхиньикэлэрин көрдө-иһиттэ. Ил Дархан Саха сирин тэрилтэлэрин дьонун-сэргэтин кытта кэпсэттэ. Саха өрөспүүбүлүкэтигэр оҥоһуллубут байыаннай бородууксуйаны көрдө.
Кини бэлиэтээбитинэн, быйыл Саха сирин быыстапкатын «Север» билим уонна үөрэх киинэ өрөспүүбүлүкэ 12 тэрилтэлэрин түмэн тэрийдэ. Тэрилтэлэр байыаннай чааһы кытта ыкса сибээстээхтик үлэлииллэр. Онон байыаннай бородууксуйа анал байыаннай дьайыы ирдэбилигэр сөп түбэһэр.
«СВО саҕаланыаҕыттан Саха сиригэр байыаннай тэриллэри уонна тиэхиникэлэри оҥоруу үлэтэ саҕаламмыта. Биһиги байыастарбытыгар күүс-көмө буолар «Сокол» квадроцикылынан уонна «Хоту-Тент» хампаанньа бородууксуйатынан киэн туттабыт. Билигин бородууксуйа араас көрүҥэ элбээтэ. Ол курдук, анал ас-үөл, саҥа «Рысь» квадроцикл уонна «Тимир Ат» электромотоцикл баар буолла», — диэн Айсен Николаев эттэ.
