Ил Дархан Айсен Николаев Бүлүү бөлөх улуустар баһылыктарыгар коронавирустан вакцинацияны уонна ревакцинацияны күүһүрдэргэ соруйда. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Кини тохсунньу 22 күнүгэр Үөһээ Бүлүүгэ өрөспүүбүлүкэтээҕи суһал штаб мунньаҕын ыытта. Видеосибээс нөҥүө Ил Дархан Бүлүү бөлөх оройуоннарыгар эпидемиологическай балаһыанньатын, вакцинацияны ыытыы үлэтин билистэ уонна суһал соруктары туруорда.
«Өрөспүүбүлүкэ сорох улуустарын уонна Дьокуускай балаһыанньатын кытта тэҥнээтэххэ Бүлүү эҥэр балаһыанньа уустугура илик. Ол эрэн кэлиҥҥи күннэргэ ыалдьыы элбээбитэ бэлиэтэнэр. Бүлүүгэ уонна Ньурбаҕа ыалдьыбыт дьон ахсаана икки-үс төгүл үрдээтэ. Сунтаарга балаһыанньа уустук эрээри, бырыһыанынан ылан көрдөххө Үөһээ Бүлүүгэ көрдөрүү үрдүк, нэдиэлэ иһигэр 10 киһи эбии коронавирустаата. Билиҥҥи туругунан 100 киһи ыалдьыбыта бэлиэтэнэр», — диэтэ Айсен Николаев.
Ураты хонтуруолу Дьокуускайтан уонна да атын оройуоннартан айаннааччыларга, ол иһигэр дистанционнай көрүҥүнэн үөрэтиигэ көспүт устудьуоннар кэлиилэригэр болҕомто ууралларыгар эттэ.
