Ил Дархан Айсен Николаев бөҕө-тирэх сайдыыга VI Хотугу форум пленарнай мунньаҕар спикер быһыытынан үлэлээтэ. Санатарбыт курдук, форум Дьокуускайга сэтинньи 26-28 күннэригэр ыытыллар.
Бастатан туран, өрөспүүбүлүкэ баһылыга үрдүк таһымнаах экспердэр кытта кэлэллэрэ, бүгүҥҥү күҥҥэ сытыытык турар тиэмэни талан улахан кэмпириэнсийэлэргэ уонна конгресстарга ыытыы сыллата форум хабаанын кэҥэтэн иһэллэрин бэлиэтээтэ.
«Дьокуускайга биһиги Хотугу форуму номнуо алтыс сырыыбытын ыытабыт. Бу сыллар устата былаһааккабытыгар билим, биисинэс, судаарыстыбаннай былаас уорганнарын бары таһымнара, норуоттар икки ардыларынааҕы тэрилтэлэр, ыччат көрсөр, түмсэр буолла. Бу биһиги форуммут наадатын, туһалааҕын бигэргэтэр», – диэн Ил Дархан эттэ.
Айсен Николаев бэлиэтииринэн, бу Арктика сайдыыта Россияҕа олус улахан, дьоһун суолталааҕын көрдөрөр.
«Нэдиэлэ анараа өттүгэр дойдубут бэрэсидьиэнэ Владимир Путин«Сталинград» диэн ааттаммыт саҥа серия номнуо алтыс атомнай ледоколун тутуутун олохтоото. Бу биһиги дойдубут төһө да тас өттүттэн саансыйалары таһаарбыттарын үрдүнэн инники бара турар. Аан дойдуга биһиги эрэ атомнай ледоколлары тутар кыахтаахпыт. Онон өрөспүүбүлүкэбитигэр бу хараабыллар серияларыгар биирдэстэрэ «Якутия» диэн ааты сүгэриттэн киэҥ туттабыт. Ледокол номнуо үлэлээн Хотугу байҕал суолун хайысхаларынан устар. Тас дойдулар саансыйалара хаһан да Россия сайдыытын тохтотуо суохтара. Биһиги Россиябытыгар өрүүтүн барытын бэйэбит бас билэбит, быһаарабыт», – диэн Айсен Николаев эттэ.
Хаартыска: Андрей Сорокин / СИА
